Tun nipui lo awm tura Old Trafford lama a contract zo tawh mai tur Paul Pogba hian, United chhuahsana Juventus a zawm duh a nih chuan United lama a hlawh mek zatve bawr vel £8 million bak a hlawh phak dawn. 

Rin dan chuan, season tharah chuan Pogba hian a club United chhuahsanin Juventus emaw Paris Saint-Germain lam a pan rin a ni. Chutihrualin, a club khelh mekna hi a chhuahsan dawn nge dawn leh dawn loh ala chiang thei rih lo.

Pogba hian Old Trafford lamah pound million 15 a hlawh mek a, sum lama harsatna tawk mek Juventus hian Frenchman hi pound million 8 bak season khat chhungin hlawh an pe thei dawn bawk si lo. Hetih rual hian, a club hlui Juventus lam pawhin a hlawh chungchanga a tawlh hniam thei deuh a nih chuan Pogba hi lak nawn leh an hreh hran lo nia sawi a awm. 

Kum 2016 khan Juventus atangin £89 million-in United hi a zawm a, mah se a beisei angin a khel tha thei lo bakah nomawi an chawi hlei thei lo va, chu chuan a tihnual ve deuh te pawh a ni mahna. 

Pogba chuan French TV programme Telefoot hnenah,"Season chu a la tawp chiah lo naa, a tawp tluk chu a ni deuh tawh mai. A chhan chu title chuh tur kan nei ve tawh lo. Kei chuan title lak ngei ka duh a, kumin leh kum kal ta te pawh khan title lak ve ka duh thin, mah se a thleng thei si lo. A lungchhiat thlak tak zet," tiin a sawi. Juventus a khelh chhung khan league title pali lain goal 34 a thun bakah assist 40 zet a nei.