ZALEN, Oct. 28, 2024: Cricket Association of Mizoram (CAM)-in season khuhhawn nana kum tina a buatsaih thin, President’s Cup chu Thawhtanni khan khelh tan a ni a, club 54 an tel.

Season khuhhawnna tournament hi CAM hnuaia club leh district cricket association zawng zawngte tana khelh theih niin CAM-in khelmual a neih chhun, Suaka Cricket Ground, Sihhmuiah khelh a ni. 

Kuminah hian team chhuak tura beisei 60 atangin 54 an chhuak thei a. District cricket association atangin Kolasib, Mamit, Serchhip, Champhai leh Lunglei an tel thei a; Aizawl khawpui pawna club awm pali – Sihphir Cricket Club, Sairang Cricket Club, Sihhmui Cricket Club leh Thingsulthliah Cricket Club te an tel thei vek bawk.

President’s Cup hi Twenty20 format-a khelh niin ni khatah inkhel pahnih (chawhma leh chawhnu) zel a awm thin dawn a, a chak lo an tla nghal zel ang.

Ruahhman dan chuan final hi November 29, 2024-a khelh tum a ni.

A tan nia inkhel hmasa zawkah Gladiators Cricket Club-in wicket ngain Khatla Rising Cricket Club an hneh a. Inkhel hnuhnung zawkah Sihphir Cricket Club-in wicket nga bawkin Thingsulthliah Cricket Club an hneh bawk.

Thawhlehniah hian Tanhril Cricket Club leh Mission Vengthlang Cricket Club an inkhel hmasa ang a, chawhnuah Dawrpui Vengthar Cricket Club leh Kolasib District Cricket Association an inkhel ang.