Cristiano Ronaldo hian United tan khel tha rih viau mah se Manchester United hi a chhuahsan mai ring an tam hle. Red Devils lam hian summer transfer window hawn hunah squad thar din an tum nia sawi thawm a awm a, Ronaldo hi koh a ni dawn nge hmun dangah a chhuahsan dawn  hriat theih a ni rih lo.

Cristiano Ronaldo hi season thar atanga an manager tur Erik ten Hag-a game plan-ah a tel lo mai thei a, tel pawh nise Man United hian Champions League an khelh phak hmel loh a, Europe title lawk leh lian ber hmachhawn lo tur chuan UCL chanchina goal thun tam ber Ronaldo tan a uiawm dawn a, a record neih sa chhunzawm tura UCL khel phak club dang zawm mai a thlanawm zawkin a rinawm.  

United manager thar tur Ten Hag hian a theih chinchinah squad thar din ngei a tum dawn a, Erik ten Hag a plan-ah hian Ronaldo hi a tel em tih hriat theih a la ni rih lo.Portuguese journalist Pedro Almeida chuan, season thar-ah Erik ten Hag-a plan-ah Cristiano Ronaldo hi a tel lo niin a sawi thung. 

Kum 37 mi Ronaldo hian tun dinhmunah chuan inkhelh level sang ber pawh hmachhawn turin a tling tawk tih a lantir fo thin avangin, khawi club pawh zawm dawn se, atan kawng an khar a rinawm loh. Season thara Cristiano Ronaldo zawm mai theih club panga te i han bihchiang teh ang:

#5 Sporting Lisbon
    Sporting Lisbon hi a naupan laia Cristiano Ronaldo khelhna thin a ni a, a lut mai a ngem? Player tam tak an hun tawp lama an chawrchhuahna club-a let leh kan hre fo thin. Tun nipui transfer-ah hian a club hlui Sporting Lisbon lamah Ronaldo hi a let thut maithei. 

September 2021 khan ADN de Lea program podcast-ah Ronaldo-a nu Dolores Aveira chuan a club hlui Sporting lamah a fapa chu lut se a duh thu alo sawi tawh a. Nu thuawih thei tak Ronaldo hian a nu thusawi hi a zawm mai a ngem?

#4 Bayern Munich
 Robert Lewandowski hi Europe khawmualpuia striker tha ber pawl leh huhang ngah ber a ni mek a, Bayern Munich tan thangkhat lian zet chu player pawimawh leh thawhhlawk ber a ni bawk. Mahse, tun nipui transfer chhung hian Polish international hian a club hi a chhuahsan maithei niin Sky Sports Germany chuan an tarlang.    

A contract neih mek hi kum khat bak a nih tawh loh vangin a chhuak duh a nih chuan hralh theih lai a hral mai hi a finthlak maithei. A nih loh chuan nakin lawkah a thlawnin a chhuak tho dawn si a.

Tun summer-ah Lewandowski hi a chhuak thut a nih chuan, ram hrang pali-a  league title pali la tawh Ronaldo hian Germany lamah bundesliga la tura thawh chhuah a hreh lo maithei. 

#3 Manchester United
 Tunhnai C. Ronaldo chetla a hmuh hian Erik Ten Hag hian a rilru a thlak thut mai thei a, tunhnaiah a chetthat em avangin club dinthar a tumna kawngah hian a thlauhthla lo maithei bawk.

Chutih rualin, United hian Champions League an khel phak lo a nih chuan cham tura Ronaldo hi hmin a ngai letling zawk maithei bawk.  Kum 37 mi hian United-ah hnuhma a ngah avangin a vawi hnih nana club chhuahsan chu a harsa maithei bawk.

#2 Paris Saint-Germain
 Club hausa Paris Saint-Germain hian Lionel Messi, Kylian Mbappe leh Neymar te kawl mah se Ronaldo-a lak luh theihna huntha an nei a nih phawt chuan kawl an hnialin a rinawm loh. 

Anni pali hi club khatah an awm ho thei a nih ngat chuan club tana sum hmuhna tha tak an ni ngei ang. 

#1 Real Madrid
Real Madrid hian C. Ronaldo hi Santiago Bernabeu lama lak let an hnial lo niin Mirror chanchinbu  chuan a tarlang a, Ronaldo hi Real Madrid player zinga ropui ber a nih angin a let duh a nih phawt chuan pasaltha hmuahin an lo hmuak duh ngei ang.     

Real Madrid hian hmatawng pet goal thei an ngah lem lova, an striker zingah Karim Benzema hi an chhawr rim hle a, eng emaw vanga a khel thei lo a nih erawh chuan a aiawhtu tur erawh an pachhe hle thung. Tun season-ah Benzama hi a chetha hle a, Ronaldo pawh hi Real lamah lut se, a hma ang ngawt chuan Frenchman hi a nek chhuak tawh maiin a rinawm tawh bik lo. Chuvangin, Ronaldo hian starting lineup a chang phak dawn lo a nih chuan Madrid lam hi a pan duh kher lo maithei bawk. 

Ronaldo Real lama a awm lai khan Benzema kha a thlawp thin a, tun dinhmunah hian lut tase, Benzama thlawptu zawka a tan a ngai tawh maithei a ni.