Aizawl: Mizorama medical college hmasa ber leh awm chhun ni bawk, Mizoram Institute of Medical Education & Research (MIMER) chuan August 7, 2018 atang hian class neih tan an tum a, hriat theih chinah seat 76 tihfel tawh a ni. Mizoram Institute of Medical Education & Research-ah hian seat 100 a awm dawn a, heng zinga 70 chu state quota a niin state quota atanga zir tur hian mi 62 tihfel tawh a ni a, India ram pawn atanga zir tur NRI tana seat 15 hauhsakah seat 14 tihfel tawh a niin central quota 15 erawh sawrkar laipui kut a nih avangin eng chin nge an tihfel tawh hriat a ni hrih lo. Hetih lai hian seat 100 hi chu hnawh khah ngei an beisei niin Zalen chuan thu a dawng. MIMER-ah hian department pathum anatomy, physiology leh biochemistry-ah te bultan a ni dawn a, tun dinhmunah duhthusam la ni chiah lo mah se hmanrua leh thawktu pawh an nei tha thawkhat tawh niin MIMER buaipuitute chuan an sawi a. “MIMER-a thawk tur mithiam te hi kan hmu nual tawh a, kan la zawng zel bawk a. Hmanrua leh building pawh kan tichangtlung zel a; chuvangin, medical college tha tak a nih ngei kan beisei a ni,” tiin MIMER buaipuitu zinga pakhat chuan Zalen a hrilh bawk. Mizoram Institute of Medical Education & Research hi Mizoram state ta niin a enkawlna sensoah hian kum tin vaibelchhe 50 vel seng tura rin a ni. Ruahman dan chuan a zir man hi hostel-a awm lote tan kum khatah Rs. 80,550 a ni ang a, hostel-a awmte tan chuan Rs. 98,250 a ni thung ang.