Aizawl; Synod Executive Committee vawi 264-na chu Thawhlehni leh Zirtawpni chhung khan Synod Office-a J.M.Lloyd Hall-ah an thu a, Rev. H.Lalrinmawia, Synod Moderator kaihhruai meeting-ah hian thu chi hrang hrang 95 lai an ngaihtuah a ni. Meeting-ah hian member 133 an kal a. Synod Secretary hnen atangin report leh sum lam report ngaihthlak a ni. ­SEC-in thu a ngaihtuah zingah hian Mizoram Synod leh KAPC Synod MoU ennawn, PCM nena Partnership ennawn rawtna, PCI Executive Member pakhat ruat thar, ECM KTP leh CKTP inpalai tawn, Synod Trust Committee Handbook siam dilna, Synod Nomination Committee member ruat, Fa pali leh a aia tam neite tanpuina pek, Medical Reimbursement Bill, Missionary Evangelist-te fixed TA, Central Kohhran Hmeichhe member tihtlem, Silchar Mission Compound Biak In revised plan & estimate, Manipuri Presbyterian Church enkawl dan tur, Youth Empowerment, Ruihhlo ngaite hmun khata dah khawm, Synod Higher Secondary School behchhana College din, Synod hnuaia Institution hrang hranga zirlai leh Trainee-te hamthatna pek dan ennawn, Synod Transit Accommodation, Imphal kalpui zel dan tur, Presbytery hrang hrang atanga thu lut leh Board hrang hrang atanga thu lut inrelbawlna lam khawih thil thahnem tak a tel. Synod sum dinhmun tarlan a ni a, kum 2016-2017 Pastoral Budget-ah Rs. 50,67,47,633/- (cheng nuai sangnga sawmruk pasarih leh singli sang sarih zaruk sawmthum pathum) hmuh tawh a ni a, hei hi 53.70% a ni a, Mission Budget-ah Rs. 40,27,45,995/- (Cheng nuai sangli sawmhnih pasarih leh singli sangnga zakua sawmkua panga) hmuh tawh a ni a, hei hi 48.89% a ni a. A belhkhawm chu Rs. 90,94,93,628/- (Cheng nuai sangkua sawmkua pali leh singkua sangthum zaruk sawmhnih pariat) a ni a, 51.46% hmuh tawh a ni. %%%%%%%%%%%