March 14, 2023; Mizoram sawrkar flagship programme SEDP (family oriented), 1st installment (phase I) Rs. 25,000 dawng tawhte chu, tun financial year chhungin 2nd installment Rs. 25,000 dang pek leh tum an ni a, hetihlai hian vawiin thlengin 2nd installment hi sem a la ni lo nia hriat a ni.  

Tarlan tawh thin angin, SEDP hi chhungkua (beneficiary) 59,996 hnenah (phase 1) 1st instalment Rs. 25,000 sem a ni tawh a. 2nd installment (phase II) pawh tun financial year chhung a pek leh tum niin, financial sanction pawh tihfel vek a ni tawh tih tun Assembly Budget Session neih zawh takah khan chief minister Zoramthanga chuan a lo sawi tawh a. Hetihlai hian sawrkar kum tawp nan ni 15 vel chauh a awm tawh chungin 2nd installment hi sem a la ni lo nia hriat a ni.

Assembly Budget Session neih zawh takah khan, member te zawhna chhangin, Chief Minister chuan, "Rs 25,000 hlawhtlinpui tham a ni lo, financial year khata kan pek tur chanve, 1st instalment chauh a ni. 2nd instalment Rs 25,000 kan pe leh dawn a, Rs 50,000 a ni dawn. Chu pawh hlawhtlinpui thamah kan ngai lo a, pek belh zel kan tum," a ti.

Chief Minister sawi danin, 1st instalment dawngte chu 2nd instalment pek leh vek an ni dawn. Chung mite hi financial year tharah pek belh tum an nih bakah, SEDP dawng thar tur sing bi thlan leh tum a ni.