Aizawl February 14, 2023: Thawhtanni khan ZPM Thalai hruaitute chuan an President Dr.C Lalrammawia hovin Kolasib Dum lui-a SEDP Pilot Project Chakai Farm an tlawh a, cheng nuai 57 chuang sen ralna, chakai 48,000 vel awm theihna tura ruahmanah hian chakai hmuh tur a awm lova, Chakai awmna tura ruahmanah hian Dhania, Behlawi leh Broccoli chin te chiah hmuh tur a awm niin an sawi. 

Chakai awmna tura ruahman plot thum atanga plot hnihah chuan tui pawh a awm lo, tiin plot dangah chuan thlai chi hrang hrang chin a ni an ti. ZPM Thalai chuan, Kolasib Dum lui-a chakai farm hi MNF sawrkâr hmasaka Falkawn Referral Hospital-a ar vulh nen khan thil thuhmun nia an ngaih thu an sawi a, an thil hmuh chu an beisei ang a nih loh thu leh pawi an tih thu an sawi bawk. 

ZPM Thalai chuan, "SEDP trade ah hial chakai farm chu mipuite thlan theih tura telh a nih tawh laia, a sulsutu chakai farm-ah pawh chakai pakhatmah hmuh tur awm lova zuihral leh si hi pawi kan ti a, MNF sawrkârah hian kuthnathawktute khai chhuah tumna tak tak hi a awm lo em ni? tih hi kan zawhna a ni," an ti.

"Mipuite hnenah thil thar hlui a nih dawnin zirchianna mumal tak awm se, thil hlawhtling tur chauh kuthnathawktute hnenah hlui ni rawh se, tih hi kan ngaihdan a ni a, kuthnathawktute tibeidawng nawn tawh lo turin MNF sawrkâr kan ngen a, SEDP hnuaiah chakai farm hlawhtlinna hi kan hmu lo a ni," ZPM Thalai chuan an ti bawk.