Tunhnai khan Chief Minister Zoramthanga hovin SEDP Governing Board chu an thukhawm a, mipuite hnena sum pekchhuah leh tul dangte an sawiho a ni. SEDP chungchang hian sawi a hlawh thin a, eptu lam chuan an sem dawn tak tak lo tih leh MNF chu an intiamna ang ngeia kuthnathawktute hnenah nuai 3 pe tur te in an phut a ni.

Tunhma tang tawhin Mizoram sawrkar hian kuthnathawk te hi ngaih pawimawh number one ah an dah deuh zel a, anmahni khaichhuahna tur leh intodelhna lam chu thupui berah an nei thin a ni. Sawrkar kal tawh ten an policy pui berah an nei thin a, kuthnathawk te hamthatna chi hrang hrang garden colony, jhum control, New Land Use Policy (NLUP), Mizoram Intodelhna Programme (MIP), NLUP tha mi tih leh tun sawrkarah pawh Socio Economic Development Policy (SEDP) te chu an flagship programme a ni a. Tuna eptu party ZPM pawhin an thupui ber chu thlai thar leina budget a 'dah' leh kuthnathawk te hamthatna lam tho a ni a, Mizoram mipui tam ber hi kuthnathawka eizawng kan nih miau avangin eng party pawhin an ngai pawimawh a ni.

Mizorama sawrkar kal tawh leh sawrkar mek ten an ngaih pawimawh ber ni chung zel si leh budget sum tam tak kalralna ni si vawiin thlenga a rah tha kan la hmu tlem lutuk hi eng nge a chhan ni ang le? Sawrkarin heng project hrang hranga a sum senral tawh te chhut hi chuan kuthnathawk te pawh ding chhuak a, kan ram economy pawh chawikang dawrh tawh tur anih laiin kan thlen chin chu kan hria a. A hlawhtlin tawk lohna ah hian tunge mawh phur ta ang le? Policy leh programme tha tak tak te hi a hmanna tur dik takah kan hman loh vang a ni thei em? Inenfiah tlan a pawimawh khawp mai.

Sawrkar kal tawh leh sawrkar mek ten policy an duan hi a tha vek mai a, mirethei te chawikanna tur vek an ni. Mahse heng policy hrang hrang te kan kalpui dan hi a dik tawk loh vanga hlawhchham (?) a ni thei ang em? Chutah tak chuan sawrkar an demawm rualin mipui pawh hian kan tih tur kan ti tawk lo a, a hmanna tur dik takah kan hman loh vang a ni tih hriat tel a tha khawp mai.

MNF kaihhruai sawrkarin SEDP dawngtu tur a thlanna ah pawh hian kuthnathawk dik tak leh a hlawhtlinpui tur tak tak thlang lovin party mi leh sa te inhaivur nan a hmang anih chuan policy tha tak hi a zuihral leh ngei ang tih a rinawm. SEDP ruahmanna tha tak hi party induhsakna atan kan hmang dawn anih chuan cheng vaibelchhe tam tak hi a zuihral leh mai ang tih a hlauhawm hle mai. Party induhsakna kan kalpui chuan a dawngtu te pawhin hlawhtlinpui tumna tak tak an nei dawn lo a, chuvangin a taka hlawhtlin pui tum ngei te chauh SEDP hi pek nise, party mi leh sa te chu a hnung lamah pek chauh ni se a hlawhtlinna pawh kan hmuh ngei a rinawm hle.