DOWNLOAD OUR APP

Read latest news on your phone
play-store app-store
app-store
ad
SEDP hian Green Re-volution thlentir thei tak maw?
titi ZALEN
Aug 25, 2019
  • H.Lalhmachhuana
    Zobawm Industry, 9862344320
  • Mizoram sawrkar thar(MNF ministry) chuan inthlan hma daih tawh atangin ram hmasawnna ngelnghet thlen thei tur SEDP (Social Economic Development Policy/Programme) chu uluk takin a lo duang tawh a ni a. Mi thlei bik nei lova thawk tha thei tur apiang tanpui leh thawhpui zel tumna, Green Revolution thlen thei tura an sawi a ni a.
  • Hei, kum chanve lai a liam tawh hnu pawhin mipuiin Tlumtea thlira kan lo thlir chu a taka thawk turin SEDP chet dan tur chu a la reh vung vung hrih a tih theih a. Engpawh nise, SEDP tihlawhtling tura Development board/committee 10 chuang siam thar zinga a then hi chu an thukhawm tan tawh a ni a. A kum khatna atana SEDP puala hman tur sum cheng vaibelchhe750 budget-a a dah hi kumin chhung (March2020 thleng) hian mipui hian kan hmang hman em ang chu maw!! Mipui zinga a tam ber, thingtlanga lo lam neitute tan chuan October/November-ah te chuan hmalak dan tur hriat/duanfel tan a hun hle dawn a, tin, Industry lam leh ran vulh lam titute tan chuan bei tura inbuatsaih chhung ‘gestation period’ thla tel fe a ngaih theih avangin, hla thuin, “Lalpa a rei lua e, kan va hrethiam lo em,” a tih anga rei lua ti kan awm nualin a lang a. Engpawh nise, July thla atanga thla2/3 chhung chuan heng Board/Committee te hi an inpeih hman thawkhat beisei phawt mai ila a dik mahna!.
  • Amaherawhchu, mi thil chik mi thenkhatte sawi danin he SEDP hian ram hmasawnna kawng dik, Green Revolution thlen chu a duhna ni mah se a thlentir theih loh dan turin sawrkar hi a che zawka sawi theih dan a awm nual a. Entirnan, development board tin hian anmahni thawh tur chanpual theuhte tha an tih angin thawk theuh mah se department/board dangte thawh dan nena inpersan leh inchawkchhe zawnga an kal chuan SEDP sum chu hlawk lo taka hman an ni thei dawn a. Economic Ideology or Economic Mechanism tel lova thawh hah vak a awm thei dawn viau a ni. Board hrang hrangte inngaihchan tawn leh tum ram thuhmun neia hma lakho dial dial a tul hle dawn a ni.
  • PM Modi-a chuan a sawrkar term 2-na bul tan lai chuan, miten India ram economy chhe mek leh tundin that tulzia an sawi laiin, Economist ropui ber zinga mi, Manmohan Singh-a chu party dang (Congress) mi pawh nise ram economic dinhmun siam that nan a thurawn la turin a pan (lenchilh) hial a. Keini (Mizoram) tan pawh hian green/industrial revolution ang chi nei thei tur chuan board/committee dangte chuan anmahni pual hna chu lo thawk mawlh mawlh pawh nise heng development department/sector- Agri te, Horti te, Vety, Fishery leh industrial development board-hote hi chu cooperation tha neia thawh ngei an mamawh dawn a. Heng development sector-te hi chu khaikhawm deuhtu leh luankhawmna bik ‘Convergence’ emaw ‘Coordinating body’ awm se a that hle a rinawm a; hetah hian tumram tinzawn ran chunga governing body thu leh hla kenkawh thiam zel a tul hle dawn a ni.
  • Kan CM berin a sawi fo ram leilung leh sik leh sa nei tha kan nih angin buh leh bala intodelh leh mipui tana eizawnna (employment) nghet, hlawk zawk leh chhenfakawm siam tum chu he SEDP hian a tum pui ber (Green Revolution ang thlentir tum) a ni ngei mai. Chutiang thlentir thei tur chuan ‘Manmohanomics’ te, ‘Modinomics’ te an tih ang deuhin ‘Zoramanomics’ chuan development board ten an enkawl tur society hrang hrang (Manmohan Singh-an Agro Business Consortium a tih ang deuh a) Agro or Horti business/processing societies te leh a thawk tak taktute chu sorkarin thawhpui/tanpui zel a tum a ni ber a. Thawktu, beneficiary te tanpui tum dan ni tura an sawi chu cheng nuaih khat hnuai mamawh te, nuaih1-3 mamawh te, nuaih5-30 mamawh te leh nuaih 30-100 mamawhte tan remchan dan siam thliah thliah a ni dawn hmel a. Tin, a diltute enfiah (verification) hna chu C te bakah NGO hruaitute, opposition party aiawh, leading citizen, etc. te kutah dah tum niin a lang bawk a.
  • Awle, sawrkar hian a thil tum tha tak chu eng emaw chenah tihlawhtling pawh nise, mipuite thil thar chhuah leh dehchhuah te chu hlawk zawka hralhna market tha neih a ngai a ni a. Kan thil tharchhuahte hi a pulung (raw) ngawt chuan hralhna man an sang thei lo va, sawngbawl (process) hnuah erawh kan process dan azirin an hlutna a sang dawrh (value added) thei chauh a ni a. Entirnan, kan rua leh mau leh hmunphiah, etc, ang chi (Forest product) te pawh hi process ngai vek an ni a; kumin atangte hian mipui hian mau/ruate hi lo ching uar viau pawh ni ila sum chang theia hralhchhuah tura sawngbawl (process) chu kum ¾ hnu lamah emaw a ni ang. Chutih laiin tun mai atanga ram leilung hausakna haichhuah theihna thil tha dang an awm nual a: entirnan Forest Based industries dang hmunphiah leh changel te leh mautuai process te bakah Agro food processing item tur thlai leh thei dangte kan nei teuh a ni a. Hetiang agro business leh food processing lam business te hi kan beih uar chuan sum hnar tha leh employment (direct/indirect) siam tamna kawng kan zawh ve tawh dawn a lo ni a. Central sawrkar chuan he thuruk hi hrechiangin Ministry of Food Processing Industries (MOFPI) chu sum tam pawh senraltir phalin a thuam uluk hle a, Mizoramah erawh department chu sawi loh, a cell emaw, a wing takngial pawh kan la nei lo.
  • Chutih rualin kan sawrkar thar hian a policy manifesto-ah Food Processing Department emaw, Wing emaw din a tum hi a din thuai chuan hmasawnna kawl eng kan hmu ve thuai mai thei a. Zoram kalsiamna huang pawimawh tak a ni thei ngei ang. Entirnan, buh (rice) thar tamna bul hnaiah buh her khawl lian bun zel a ni ang a, chutiangin vaimim thar tam theihna hmun velah vaimim her khawl/ranchaw siamna khawl te bun nual an lo ni thei ang a. Lakhuihthei/saptheite an thatna hmunah chuan chutiang thei herna (process-na) khawlte bun an lo ni ve zel bawk ang a. Kan thlai thar chhuahte ram chhunga hralh tur emaw, ram pawna hralh chhuah (export) tur chite tan Primary or Semi-processing Centre te leh Food Processing Centre eng emaw zat a awm a tul dawn avangin hetiang lama tui mi leh training chhuakte (Skill development and entrepreneurship training) kan nei nual ngei ang a. Tichuan, kan sawrkara a fawng vuantute ber hian tih tak takna nen an beih chuan kum 2/3 emaw hnu lamah chuan Green Revolution or Industrial Revolution chu SEDP kaltlang hian a thlen dan a awm mial mai thei a ni.

Latest News & Chhiar Hlawh