ZALEN, Nov. 25, 2024: Khawvel huap badminton inelnaa Mizo zinga medal la hmasa ber a lo ni tawh, C. Lalramsanga leh a kawppui chuan Odisha-a ram pum huap inelnaah champion tura rinkai Seeded No. 1 leh 3 inkar hneh vekin India champion an ni leh ta.

Thawhlehni atanga Bhubaneswar, Odisha-a khelh Yonex-Sunrise 47th Inter State – Inter Zonal & Junior National Badminton Championships 2024-ah Durtlang rawlthar hi a kawppui, Vishakha Toppo nen mixed doubles-ah an champion a ni.

Ramsanga te thian dun hian final-ah Seeded No. 2 Bhargav Ram Arigela leh Vennala K. te tangdun chu 21-16, 10-21, 21-18 in an hneh a ni.

Final lut tur hian an kalkawng pawh a hautak hle a, champion tura rinkai ber, Vansh Dey leh Manya Ralhan te tangdun chu quarterfinal-ah hmachhawnin deciding game-ah 13-21, 21-16, 21-13-in an hneh a. Semifinal-ah pawh Seeded No. 3 Bhavya Chhabra leh Taarini Suri te tangdun chu 21-17, 21-18-in an hneh leh bawk.

Mission Veng Badminton Club-a khel lai, Ramsanga hi Mizo zingah All India Junior Ranking Badminton Tournament-a gold medal la thei hmasa ber a lo ni tawh a. Tunah national championship-ah gold medal a vaw chhuak leh thei a, Mizo zingah national junior badminton championship-a gold vaw chhuak thei hmasa ber a ni bawk.