Active Sound buatsaih Inter Village Band Contest SEKI season 2 intihsiakna chu neih chhoh mek zel a ni a, a hmawr bawk a hnai ta. Ningani zan leh Zirtawpni zan khan top 10 te an intihsiak a, July 5, Thawhlehni zanah final hi neih a ni ang.

Top 5 te chu
Open category-ah hian band tha tak tak an inlan a, chung zinga che tha zualte chu  - Chanmari West LC, Chanmari West LC Polysphere, Electric Veng LC, Ramthar Veng LC leh Serkawn VC, Lunglei te an ni. Top 5 te hi July 7 & 8 zanah Vanapa Hall-ah bawk an inlan leh dawn a, zaithiam tak takte nen concert an nei ang, result puan a ni bawk ang. A hmunah ticket lei tur a awm dawn bakah, LPS lamah pay per view a tih theih dawn bawk. 

Band thazual panga te hian July 5, Thawhlehni zanah intihsiak an hmachhawn leh dawn a, hei hi final a ni tawh dawn. Final-ah hian Open leh under 19-a band tha top 5 te an inlan dawn a, July 7, Ningani zanah Under 19 result puan a ni ang. Open category result chu a tuk leh July 8, Zirtawpni zanah puan a ni ang a, result puan zan hian concert puitham tak a awm ve ve ang. 

Concert...concert 
Concert-ah hian Mizo band tha - Shai Hills, Avora Recors leh The Prophets te an inlan dawn a, rock music ngainatute tan chuan hmaih phal chi a ni lo ang. SEKI season 1 winner Ramhlun South LC te an perform dawn bawk a, an thiam an la theihnghilh loh ang tih a chiang. 'UNI' hitmaker G'nie leh Hriatrengi Lailak te perform pawh mipui hmuh chak tur a ni a, Benjamin Sum leh Mami Varte an la awm cheu bawk. 

All Mizoram Inter-Village Band Contest 2022-ah hian open leh under 19 category a awm a, lawmman pawh a hrana siam a ni. 
Open catergory-a pakhatna te hian Rs. 1,00,000 (nuai khat) an dawng dawn a, citation leh trophy a keng tel bawk. Pahnihna leh pathumna ten Rs. 30,000 + citation leh Rs. 20,000 + citation te an dawng dawn a ni. U-19 catergory-a pakhatna te hian Rs. 25,000+citation + trophy an dawng ang a, pahnihna leh pathumna ten Rs. 15,000+citation leh 10000+ citation te an dawng bawk ang.