Emma Raducanu chuan a tum thum nana WTA tour lak ngei a tum laiin quarter-finalah Marta Kostyuk a paltlang zo lo. Transylvania Open khelh mekah kum 18 mi US Open champion hlim Emma Raducanu chuan, a idol Simona Halep hmachhawn thei tura semi-final luh ngei a tum laiin teenage tho Ukrainian nula Kostyuk-i lakah 6-2 6-1 in a chak lo. 

Kostyuk-i hian junior level atang tawhin amah khelh dan a thiam thu match tan hmain Raducanu hian alo sawi lawk tawh a, minute 57 an khelh hnuah chak lovin Raducanu chuan,"Ka chauin ka tuan a muang em em a, Marta hian chak a phu a ni," a ti. 

Briton nula hi seeded pathumna niin a hneh tak loh kum 19 mi Marta hi seeded parukna a ni thung. Raducanu chuan,"Kan khelh hma reng atang tawh khan ka taksa hi 100%-in ka fit lo tih ka hria a, kan practice-naah pawh ka chau em em a ni. Mahse, hmalam pana kal zel mamawh ka ni a, chuvangin tournament dangah ka rawn let leh thuai ang," a ti. 

Kostyuk hian semi-finalah Jaqueline Cristian-i 6-1 6-1 a hnehtu Simon Halep a tum ang.

Tun tum Romania-a tournament hi Raducanu-i tan danglamna tak a nei a, tunah hian a pi chu Romania-ah hian a la khawsa mek a, a pa Ian a pianna ram a ni bawk a ni. Raducanu-i hi tunah ranked 23-na a ni mek a ni.