Yonex-Sunrise Maharaja Agrasen All India Masters Ranking Badminton Tournament 2024 khelh mekah Mizo pa, Lalthanzuala’n semifinal a lut a. Final luh inchuhin world champion leh a lo hneh loh tawh nen an insu dawn a, beiseina sang tak a nei a, a phur hle.

Chanmari West pa hi Inrinni atanga Mohali, Punjab-a tournament khelh mekah hian kum 55 chung lam mipa maltan (55+ men’s singles)-ah inlanin Ningani khan quarterfinal-ah chakin a thiam pali zingah a tel.

Mizoram Police Badminton Club (MPBC)-a khel lai, Seeded No. 4 Zuala hian quarterfinal-a Nagaland player, Seeded No. 5 Achumi Yakhuvi chu 21-14, 21-11-a a hneh hnuah September thlaa South Korea-a World Masters Badminton Championship 2023-a 55+ men’s singles champion, Rajeev Sharma a hmachhawn zui dawn a ni.

World champion a hmachhawn thei tur chu a lawm hle tih Zuala chuan a sawi a, “Nikum January thlaa All India Masters Ranking Tournament, Udaipur, Rajasthan-a kan khelhah final-ah 20-22, 19-21-in ka lo hneh tawh lo a. Tun tumah hian hneh ngei tumin theihtawp kan chhuah ang,” a ti.

Zuala hian a thiam pali zinga tel turin a kalkawngah round of 32-ah Sawinder Singh chu 21-6, 21-16-in a hneh phawt a, round of 16-ah Seeded No. 9 Prashant Mukherjee chu straight set bawkin, 21-7, 21-19-a hneh lehin quarterfinal a lut a, semifinal a lut zui leh ta a ni. 

Mizoram Badminton Association (MBA) chuan Zuala hi a thlen chinah a lawmpui tak zet tih an sawi a, a khelh leh tur atan duhsakna hlanin harsatna nei lova tha taka a khelh theih nan an tawngtaipui tih thuchhuah siamin an tar lang.