CoVID-19 vanga hun rei tak football kan chawlsan hnua tournament lian ber LBS Suzuki Inter Village Football Tournament khelh meka semi-final khel tur team li zingah Aizawl atangin Ramhlun North LC chiah an lang. 

Nimin khan quarter-final khelh zawh niin Sialhawk VC leh Ramhlun North LC ten an khingpui ve ve hnehin semi-final an lut a, quarter-final khelh hmasa zawkah Lengpui VC team leh Champhai Kanan VC ten semi-final an lo lut tawh bawk. Inrinni July ni 16 khian AR Lammual-ah semi-final khelh a ni ang a, , Sialhawk VC leh Ramhlun North LC ten an khel hmasa zawk dawn a, dar 12:30-ah an khel ang, Lengpui VC leh Champhai Kanan VC te hi chawhnu dar 3:30-ah an khel thung ang. 

Nimin quarter-fianal game 3 ah hian Mizoram khawchhak kil tawp a awm Farkawn VC leh Sialhawk VC an inhmachhawn a, hun pangngaiah 2-2 in an inhneh tawk a, Extra time khelh zawm niin Danmawia khelhna Sialhawk VC te 4-2 in an vannei ta zawk a ni. 

Inkhel atanga nawrtu zawk Sialhawk VC tan Lalmuankima'n minute 21-naah goal hmahruai a khung a, minute 28-ah Farkawn VC lamin Lalrinpuia hmangin an sut nghal. Sialhawk lamin minute 35 naah Biakdika hmangin an goal hnihna an thun leh a, first half-ah goal dang a luh belh lo. Second half hun tawp dawn hnaih-ah Rinpuia hmang bawkin Farkawn siphurh sut-na goal a khung. Extra-time khelh niin a fit leh tawnhriat ngah zawk Sialhawk an chungnung deuh a, Rotluangliana leh Vanlalduata hmanga goal thun belh lehin 4-2 in an chak ta zawk a ni. 

Quarter-final game 4-naah hian Aizawl LC team tha pahnih Armed Veng South LC leh Ramhlun North LC inhmachhawn lehin Ramhlun lamin 2-1 hnehna an chang. He inkhelhah hian inkhelh kaihruaitu referee thutluknaa lungawi lo Armed Veng South VC team tantu ten buaina siamin field chhungah um ruak an paih lut nual a, Lammual thutna an tichhenual bawk nia sawi a ni.