Milan khawpuia Serie A palian pahnih, Inter Milan leh AC Milan aia inhre chiang club hi an tam bik kher lo vang. Uefa Champions League semifinal-ah an inhmachhawn dawn.

Milan mi lian pahnih, khelmual hmingthang, San Siro pawh intawmtute hi an lo inkhelh tawh thinah an lo intibuai fo tawh.

Inter hian Nilaini zan khan Champions League-ah Benfica chu quarterfinals atangin an pet chhuak a, San Siro-ah 3-3 in inhnehtawk mah se Portugal-a 2-0 a an lo chak tawhna nen 5-3 in an tlang a. A hma zan chiaha an Italian-pui, Serie A champion nih hnaih tak, Napoli hnehtu, Milan nen final luh an inchuh ang.

"Inter a ni emaw, Milan pawh ni se, an fan-te zingah intum duh an awm lo vang, a pressure hi awihawm loh khawp a ni thin tlat," tiin Italian football writer Vieri Capretta chuan Milan derby khelh hmabak chungchang chu a sawi nghal.

"Cup inchuhnaah inkhelh an thiam dun a, Inter hian tun season Super Cup-ah an hneh tawh a. Champions League chu a dang dawn; mahse, pressure a tam dawn lutuk," a ti.

Milan club pahnih hi tun season-ah pawh vawi thum an inhmachhawn tawh a, Inter hian Serie A leh Italian Super Cup-ah an hneh a, Milan-in league inkhel pakhat zawkah hnehna an chang ve thung.

Champions League-ah bik, kum 18 zet hnuah, June 10-a Istanbul-a final khelh inchuhin a vawi khat nan an inhmachhawn leh dawn ta a. An intum hnuhnung berah khan an inkhel chanchin aiin mipui atanga buaina chhuak an larpui zawk!

3-0 a Inter an hnufual laiin fan-ten khelmuala flare an vawm luhin Milan Brazilian keeper Dida dar a fuh a. Minute 20 an chawlh hnuah an tan leh a, second 30 chiah an khel leh hman tihah an chawlh leh a ngai nghal a. Hemi tum hian Carlo Ancelotti-a kaihhruai Milan hi tlangin semi-final an lut.

Milan team hnih hi Champions League-ah vawi 10 zet an lo champion tawh a, Inter hi kum 2010-a Jose Mourinho-a hova an champion hnua semifinal an luh vawi khatna chauh a ni thung.

Coach Simone Inzaghi-a hi European Cup-a 1980-81 a Eugenio Bersellini-a'n semifinal a luhpui hnua Italian manager zinga semifinal-a Inter luhpui leh thei hmasa ber a ni bawk.