ZALEN, September 27, 2025: Chawlhkar hnih liam taa Mizo damlai zinga upa bera puan, Lalneihsangi, Pi Buangi tia hriat lar chu Inrinni zan dar 07:55 khan Ebenezer Medical Center-ah awmlaiin a thi. 

Pi Buangi hi September 13 mai khan Social Welfare Minister Lalrinpuii chuan Mizo damlai zinga upa berah a puang a, kum 108 mi a ni.

Venghnuai, Aizawla piang leh sei lian, Pi Buangi hi Mizorama an chhungkuaa Salvation Army zawm hmasate zinga mi an ni a, a pa, Thangchhunga pawh Mizorama Corps Sergeant Major (CSM) hmasa ber a ni. 

Pi Buangi hi Mizo zinga rehabilitation centre-a thawk hmasate zinga mi niin, Behala Girls’ Home, Kolkata, West Bengal-a hmeichhe rahbi tleu leh fahrahte enkawina hmunah a thawk thin a. Kum 2022 khan Heritage Award buatsaih, Mizo Hmeichhe Chhuanawm (Women of Substance) hlan a lo ni tawh bawk.

Pi Buangi hi tlaivarpui a ni ang a, Pathianni chhun dar 1:00-ah vui a ni ang.

#zalennews