Film lama tui mite tan thu lawmawm hriat tur a awm leh ta - Mizo Film Award chu September hian sem a ni leh dawn! Award hian December 2021 atanga August 2023 inkara film chhuak tharte a huam dawn a ni. 

Kum 2021 khan Tlau Entertainment buatsaihin sem a lo ni tawh a, ngaihhlut pawh a hlawh hle a nih kha. Tun hnai kum rei lo te chhungin Mizo film thahnem tak a chhuak leh tawh a, award pawh sem a ni leh dawn ta a ni. Mizo Film Award 2023 hi September thla tawp hian sem a ni dawn a, a ni tur tak erawh tihchian a la ni lo. Inbuatsaihna hrang hrang kalpui mek niin, a hmun tur pawh hriat theih thuai beisei a ni. 

Category hrang hrang a awm leh dawn a, Mizo film tha tak tak zing atangin award dawn phu ber ber thlan chhuah a ni leh dawn. Mipui lam pawhin chanvo an nei leh dawn a, mipui vote a hlu leh viau dawn a ni. Kan film ngainat leh a changtu kan duh em emte khan chawimawina an dawn theih nan kan support ve an ngai dawn tihna a nih chu. 

Mizo Film Award 2023 hi Entertainment Society of Mizoram (ESM) buatsaihin sem a ni dawn a, Tlau Entertainment chu YouTube partner an ni ang a, Explore Mizoram chu website partner an ni thung ang.