Thla thar November 7 leh 11 inkar chhung khian Serchhip District-ah HIV/AIDS dona atan ‘Zoram harh rawh’ campaign pualin YMA Branch te tan Mizo Hnam Lam (Folk Dance) leh Mizo Hnam Hla (Folk Song) hmanga inelna buatsaih a ni dawn.

Hemi chungchang ngaihtuah hian Serchhip DC Meeting Hall-ah District Level Organising Committee chu Serchhip District Bawrhsap Nazuk Kumar, IAS hovin an thukhawm a, HIV/AIDS dona atana he intihsiakna neih tur chungchang hi Bawrhsap chuan a sawifiah hnuah inelna buaipui tur hian Organising Committee din nghal a ni. 

Central Young Mizo Association (CYMA) leh Mizoram State AIDS Control Society (MSACS) te thawhdunna anga neih tur he intihsiakna hi District hrang hrangah neih tura ruahman niin, November 15 atanga 19 chhunga neih tura tih ni mah se remchan zawkna avangin Serchhip District-ah chuan November 7 leh 11 chhung khian neih tura ruahman a ni. Intihsiakna hi zan lamah Serchhip Auditorium-ah neih tura ruahman niin, MSACS emaw, District AIDS Control Society emaw atangin HIV/AIDS dona atana inzirtirna hun hman thin a ni ang. Town Area pawnlam atanga tel te chu an kalna senso phuhruk then dan ngaihtuah an ni dawn bawk a ni.

He intihsiakna neih tur atan hian Serchhip Sub-Hqrs. YMA huamchhunga YMA Branch 73 atangin Branch 13 te chuan an hming an pelut tawh a, Branch tam zawk an tel theihna turin ruahmanna an siam bakah inziahluh theih a la ni dawn a ni. Intihsiakna atan hian Mizo Hnam Lam pahnih - Cheraw (Kantluang) leh Khuallam te chu thlan niin, member 20 aia tlem lo tel tur a ni ang. 

Mizo Folk Song-ah hian hla panga (5) - Darmani Zai, Lianrikhumi Zai, Awithangpa Tlawh Zai, Labour V Force Zai leh Domangi Zai te thlan a ni bawk. He intihsiakna a pakhatna chuan lawmman Rs. 50,000/- an dawng ang a, pahnihnain Rs. 30,000/- leh pathumnain Rs. 10,000/- an dawng dawn a ni. Branch pahnih tan Consolation Prize Rs. 5000/- ve ve ruahman a nih bakah, Participation Prize Rs. 1000/- theuh pek an ni dawn bawk. 

District hrang hranga a titha thlanchhuahte hian December 1, 2022 khian Aizawl-a Dawrpui Multipurpose Hall-ah State Level inelna an hmachhawn leh dawn a ni.