Aizawl October 30, 2023 : Vawiin khan Mizo National Youth Front, Serchhip East Block huaihawtin Serchhip bazarpui chhehvel bawlhhlawh chharfai hnatlang thawh a ni a, he bial candidate J. Malsawmzuala Vanchhawng chuan thalaite chu MNF nih inchhuang turin a chah.

He hun hman tan hma hian Mizo Hnam Run, Serchhipah inkhawm tawi neih a ni a. MNF official candidate J. Malsawmzuala Vanchhawng chuan thu sawiin, "Thalaite hian MNF nih kan inchhuang tur a ni. A chhan chu 1961 chhoah kan rama sumdawnna leh thil pawimawh tam tak hnam dangin an thunun a- Vaihla kan ngaithla a, vai lamin kan thalaite pawh an lam vek tawh a ni. MNF chuan zalenna sualin ram leh hnam tan ke a pen a. Kum 20 hnuah Mipui, Kohhran leh Zirlai Pawl ngenna avangin kum 1986 khan Inremna ziah a lo ni ta a."

"Tichuan tunah hian ram leh hnam tana ding ngam zelin kan awm a, ralmuang takin Mizo hnam chuan hmalam a pan mek a ni. MNF chu Sakhaw tih bik nei, Kristianna chawisanga chawivul tura din a ni a. Kan unaute tan huai takin MNF hi a ding thin. Myanmar, Bangladesh leh Manipura kan unauten harsatna an tawh laia huai taka tuamhlawm leh kuahkhawmtu chu Zoramthanga hruai MNF chiah a ni" a ti.

Serchhip East Block MNYF President Lalramthara chuan MNYF member 400 velin khawlai bawlhhlawh chhar fai hnatlang an thawk tih sawiin, "Hei hi Thalaiten politics huang hi insawichhiatna ringawt lo, ram tana thil tha ti chunga khelh theih a ni tih kan hriat nana huaihawt kan ni," a ti.

Serchhip East Block MNF President Thianghlima pawhin hnatlang thawktute hnenah fuihna tawi sawiin, 'Inthlanpuiah MNF in chakna a chang ngei dawn a. Tunah hian kan candidate Pu J. Malsawmzuala Vanchhawng hian hnehna a chan chuan Minister bial kan nih ngei kan ring a. Minister bial ni chunga hmalak pawh a chakawm tawh hle a ni," a ti.