ZALEN May 12, 2026: Serchhip Police te chuan Mobile Phone rukbo report an dawn pali te chu CEIR Portal kaltlanga an chhuichhuah hnuah nimin khan a neitute hnenah an hlanlet.

Serchhip Police te hian Mobile Phone rukbo an hnena Report te chu CEIR Portal kaltlang hian a zawnchhuah hna an thawk thin a, nimin khan Mobile Phone rukbo an chhuichhuah pali (4) te chu a neitute hnenah hlan letin heng zingah hian nikum October leh November thlaa bo pakhat ve ve bakah kumin April thlaa bo pahnih te a ni a, an zinga pathum hi April thla khan hmuhlet niin pakhat hi tun thla a hmuhlet a ni thung a, Serchhip P&E Veng, Chanmari Veng leh Ramthlun Veng bakah Thenzawl-a mi pakhat te a ni.

Tun tum hi Serchhip Police ten CEIR Portal kaltlanga Mobile Phone rukbo an chhuichhuah a neitute hnena an hlan tum thumna a ni a, a hmasa ber atan kumin January thla khan mi 6 te hlanin April thla khan 5 an hlan leh a, tuna an hlan nen hian Mobile Phone bo 15 te chu a neitu hnenah an hlan let ta a ni.

#ZalenNews