Aizawl: Aizawl DC chuan Zirtawp zan rei tawh takah khan thupek tichhuakin nimin (Inrinni) khan curfew a thlahdul a, mahse hei hi a hnu lawkah sut lehnghal a ni. Zirtawp zan khan Serchhip atangin thlai thar quintal 300 chuang chu Aizawl a hralh turin phurh luh a ni bawk.

Aizawl DC order ah hian mipui ten mamawh zualpui an lam hun atan March ni 28 (Inrinni) zing dar 7 atanga tlai dar 5 inkar chhung AMC area ah hun hawn anih thu a tarlang a. Thupek hian sawisel a hlawh nasat avangin a hnu lawkah sut leh a ni.

Aizawl DC in mipui mamawh lamna hun a siam hi Mizoram Govt. Doctors Association chuan an duhloh thu an sawi nghal a. Anni bakah veng hrang hranga local task force te chuan DC thupek hi zawm an tum loh thu an sawi bawk.

Tualchhunga thlai thartute thlai tharchhuah dehralna tur ruahmanna zulzuiin Zirtawp zan khan Serchhip dai, Zawlpui atanga thlai tharchhuah quintals 300 chuang chu Aizawl ah phurh thlak a ni.
Thlai thar hi lirthei 18, 207 Truck 15 leh 407 Truck 3 hmanga phurh thlak niin Aizawl lama Supply Chain buaipui tura sawrkarin a din ten an lo dawngin mipuite hnenah fel fai takin an hralh ve leh ang.