Aizawl: Serchhip ZPM Steering Committee chuan Operation Joshua hming vuahin Serchhip Constituency chhung intin luhchhuak a, ZPM-a tel ve (support) tura beihpui thlakna chu nimin (1st September 2018) atang khan an kalpui tan a, Operation Joshua hi September thla chhunga zawhfel hman tura ruahman a ni.   Serchhip ZPM Steering Committee chuan nimin khan thuchhuah siamin, “Mizoram state kan nih hnu kum 30 chhung political party 2-te min kaihhruaina hnuaiah kan awm a, eng kawngahmah kan intodelh lo a. Sawrkarin zu a zuar a, ruihhlo vangin kan thalaite an thi zawih zawih a. Ration buhfai buk a dik hleithei lo va, hmasawnna hnathawh apiang YMA vilpui vut vut ngaiin a awm zel a, kan ram hi a damlo a, thihsualin a rum mek a ni,” an ti a. “Sawrkar dik lo paihthla a, kalphung thar - Mipui Sawrkar din tur hian nang leh kei hian tih theih kan nei. Party Politics atchilhna bawih ata lochhuak la, Pathian leh a Kohhranhote duhdan ngaichang chunga rorel intiam ngam ZPM - Tangrual Pawl hi rawn zawm ve teh. I ramin a ko che!” tiin ZPM zawm vek turin an sawm.   Serchhip ZPM Steeing Committee hnuaiah hian Serchhip khawpui chhunga VC Area 10-ah ZPM Local Body din fel a ni tawh a, Serchhip bakah hian Thenzawl, Bungtlang leh Chhiahtlangah te Serchhip ZPM Steering Committee kaihhruaina in ZPM Steering Committee din a ni tawh bawk.