Happy Face killer tih hming lem an phuahsak tualthattu fanu Melissa Moore chu, a pa-in social media leh lehkhathawn kaltlangin a pasal neih ni-a a lan thau thu a thlalak nen thlap a rawn hrilh hnuah a fanu awm a nuam thei lo. 

Serial killer hmingthang tak fanu chuan a pa jail lama tang mek hnen atanga lehkha a dawn thin thu leh an inneihnaa a la thau hle thu a rawn ziahna lehkha pakhat a dawn tel thu a sawi.

Melissa Moore hi TikTok hmang thin niin 'lifeafterhappyface' tia indahin a in post thin a, a pa chu tualthattu 'Happy Face' Keith Hunter Jesperson a ni. Kum 1990 chho vela America rama hmeichhe pariat zet thattu kha a ni.

A pa hian lehkha a thawn chhuak pei hle a, media leh thuneitute hnenah lehkha a thawn zing hle a, a lehkhathawn ziah reng rengah emoji nui lai lem a ziah lan tel ziah avangin 'Happy face' tih hming lem hi an phuah sak a ni. 

Parole pawha chhuah an phal loh Oregon State Penitentiary-a dam chhung tang tur a pa lehkha thawn thenkhat chu a fanu hian a rawn sawi chhuak ta a ni.

A lehkha thawn pakhatah chuan pasal a neih hma thlalak leh a pasal neih hnu thlalak thun telin July thlaa pasal a neih tuma sawm a nih loh chhan a zawh thu a video-ah a tilang a. 

Chu video chuan like 993,000 chuang zet a nei bawk. Chu video-ah chuan Melissa chuan a pa zawhna chhangin,"Tun nipui lai July thla khan pasal a neih thu leh a pasal neihna thlalak chu a pa-in a rawn thawn thu a sawi a. Engtin emaw tak tan in atangin ka Instagram a hmu thei a ni. Lehkhaah chuan, ka thau hle a, ka pasal pawh a thau hle bawk tih a rawn sawi a, kan tlan ngai lo a nih a rin thu a rawn sawi lang bawk. Kan inneihnaah duhsakna min rawn hlan tel bawk a, "Ka fanu, ka la hmangaih reng che a sin. He thu hi min hriatsak reng rawh aw!" tih a ziak lang bawk a, mahse a thu hnuhnung berah 'Eng vangin nge min sawm ve loh?' tih a ziak tel hram. 

Nikum khan Krismas a pa hnen atangin thilpek a dawn thu leh hawn a hlau hle tih a sawi lang bawk a, "Chuan nikum Krismas atan khan he package hi mail-ah ka dawng a. Ka hawn lai chuan a rilru a nuam chiah lo, a chhungah chuan tâng ve tho a thianpa in purse min siam sak hi a lo awm a ni," a ti.