December 14, 2022; Dr. HTC. Lalrinchhana, Special Judge, Prevention of Corruption Mizoram chuan, Er. Liansanga E-in-C/Secy PWD (Rtd) leh Er. Lianchungnunga CE(Rtd) te Serkhan-Bagha road thawmthatna tur sum hman dik loh chungchangah thiam loh a chantir a, B. Lalthanpuia Assistant/Accountant erawh chu finfiahna that tawk loh avangin chhuah zalen (Acquit) a ni thung. An pahnih hian Jail-ah dah luh nghal an ni a, hremna chungchang hi naktuk lamah ngaihtuah (Sentence hearing) leh a ni ang.

B. Vanlaltana, President Hmarphei Zirlai Pawl chuan Serkhan-Bagha Road kawng siam chungchangah eirukna awm ngeia an hriat avangin ACB-ah Complaint an theh lut a, case register a nih hnuah a tul ang a chhui zui a ni.

Thubuaia lan dan chuan 12th Finance Commission chuan Mizoram sawrkar-ah 2007-2008 a hman tur kawngpui siamthat leh Lei dawhthatna tur Rs. Nuai 1053 a rawn pe. He pawisa atang hian Liansanga E-in-C (Rtd) chuan Lianchungnunga CE (rtd) hnenah Serkhan Bagha road siamna tur Rs. Nuai 175 a pe chhuak a, Lianchungnunga hian Rs. Nuai 155 chu EE Kolasib hnenah pein, Rs. Nuai 20 chu remchang danga pek chhuah leh turin a kawl thung a ni.

He pawisa bakah hian Mualkhang-Hortoki kawng siam nana ruahman Rs. 87,67,147/- chu Serkhan Bagha road atan sawn (transfer) niin EE Kolasib pek a ni bawk. Serkhan-Bagha road siam nana EE Kolasib kuta sum dah zawng zawng chu Rs. 2,42,67,147/- a ni.

E.E. Kolasib hian Rs. 87,67,147/- chu Lianchungnunga CE (Highways) hnenah ah 31.03.2008 khan a pe let (Surrender) a, tichuan Rs. Nuai 20 a lo kawlthat nen Rs. 107,25,000/- chu Liansanga hnenah pek let a ni ta a, Lianchungnunga kutah hian Rs. 42,147 chu a bothlau a ni.

Hetih lai hian Accountant General Mizoram report-a a lan dan chuan 12th Finance Commission-in Mizoram PWD hnena kum 2007-2008 chunga pawisa a pek atanga Serkhan Bagha road siamna tura ruahman chu a bo a bang awm lova hman zawh vek a ni tiin report a ni thung si a, hei vang hian Er. Liansanga chu Rs. Nuai 107.25 eiru a ngaih a ni. 

Finance department chuan Mizoram PWD hnenah 2004 to 2009 chhung khan Serkhan Bagha Road thawmthatna tur Rs. Nuai 696 an pe a, Liansanga hian EE Kolasib hnenah Rs. 435.24 a pe chhuak a, a la bang Rs. Nuai 260.81 chu HMLC/Competent Authority remtihpuina tel lovin hmun dangah a hmang (divert) a ni. An divert atanga hian Rs. Nuai 182.55 chu hmanna hriat lohvin a awm.

B. Lalthanpuia he Rs. Nuai 182.55 hman ralna document lem a siam chawp avang leh mi signature a siam chawp nia ngaih anih avangte a thubuai siam sak a ni bawk.

Er. Liansanga hi Rs. Nuai 107.25 eiruk thubuaiah leh thuneihna hman sual (Abuse of Official position) ah te leh Serkhan-Bagha road resurfacing na tur atana sum dil chhuah a nihna anga hman si loh chungchangah thubuai hi siam sak niin, Lianchungnunga hi Rs. 42,147/- eiruk thuah leh Rs. Nuai 20 surrender loh vanga lapse chungchang  information dik lo (Fabricated false information) ACB hnena a pek avang te a  thubuai siam sak a ni.

An pathum hian U/s 120B/420/468/477A IPC r/w section 13 (1) (c) (d) and 13 (2) of Prevention of Corruption Act, 1988 ah thubuai siam sak an ni a, B. Lalthanpuia hi finfiahna that tawk loh avangin chhuah zalen (Acquit) a ni a, Er. Liansangathiam leh Er. Lianchungnunga te Section 120B/420 IPC r/w Section 13(1)(c) (d) Prevention of Corruption Act,1988-ah te thiam loh chantir an ni.