ZALEN September 25, 2025 : Vawiin chawhma dar 11 khan Zoram Thar hruaitute chuan Mizoram State Assembly Speaker Lalbiakzama hnenah hnam nihna (national identity) Zofate a nih thu Session sawiho tura chhawp chhuak tura ngenna an theh lut.

Zoram Thar chuan an thu thehluh leh thehluh chhan te Aizawl Press Club-a Press Conference neiin an sawifiah. Zoram Thar hruaitu Zaichhawna Hlawndo chuan, "Assembly Speaker hnena kan lehkha thehluh chu hnam tobul an chhui chhuah atangin kan thlahtu Zo, Zova, Yo leh Jo a ni ti a, pi leh puten an lo sawi thin Bible a Jakoba (Israela) fapa Zosefa kha a ni a. Keini Zo hnahthlak intite hi Zosefa fapa pahnih - Ephraim leh Manesia thlah kan zel Zofate kan ni tih a ni," a ti. 

He lehkha an thehluh-ah hian Zoram Thar hruaitute hian hnam nihna sawifiahna United Nation-ah te, India leh Israel Prime Minister hnenah leh khawvel ram Veto power nei- USA, UK, Fance, Russia hruaitute hnenah an thehluh tawh thute an ziak tel bawk. December 17, 2021 ah Zofate hnam lungphun Thenzawlah hawn a ni lh tawh thu te, he hnam lungphunah hian Zo hnahthlak Zofate chi hming zawng zawk ziah vek a nih tawh thute an ziak tel. He hnam lungphunah hi hnam peng aiawh theuh ten an hawng a, pawl hrang hrang aiawhte nen innlungrualin Hnam Nihna Thuthlung (National Identity Referendum) siamin a nemngheh nan hming an lo ziah tawh thute an thlen tel bawk. 

Zoram Thar hruaitute chuan, "Zofate hi kan bona a rei tawh avangin kan hnam nihna dik tak pu tawh lovin hnam hrang angin kum tam tak kan lo awm tawh tih an sawi a. Mahni ramah cheng mah ila hnamdangte rorelna India, Myanmar leh Bangladesh hnuaiah kan la awm rih a ni. Thlahtu bul thuhmun, hnam khat vek si kha hnam hrang anga chhinchhiah kan ni. India Constitution Article 366 (25), Article 342 leh Article 744 ah te chuan Assam, Meghalaya, Mizoram, Nagaland, Tripura leh Manipur-ah Zo hnahthlak Zofate chu hnam (tribe) hrang 25 - Mizo, Hmar, Pawi, Lakher, Kuki, Lushai, Paihte, Gangte, Vaiphei, Thadou, Halam, Anal, Chiru, Chothe, Ralte, Simte, Kabui, Koireng, Kom, Maring, Monsang, Purum, Simte, Aimol leh Zou ti a ziah kan ni," an ti.