Aizawl: Naktip Thawhlehni atanga Assembly Budget session neih turah Zirtawpni thleng khan sawrkar Bill lut a la awm lo. Assembly thawktute hnen atanga Zalen thudawn danin Zirtawpni thleng khan House-a chhan turin zawhna starred question 439, ziaka chhan chi zawhna unstarred question 51, private member resolution 26 leh paper lay tur 3 a lut tawh a ni. Tarlan tawh angin session tan ni hian Larsapin thu a sawi ang a, a tuk Nilaini ah session neih kar laka boral MLA hlui pahnih Lalchunga Chinzah leh J.Kapthianga te sun an ni ang a, Ningani (15.3.2018) ah Finance Minister in kum 2018-19 Mizoram budget leh 2017-18 sum dilbelhna te House ah a pharh dawn a ni.