Aizawl: Naktip March ni 14,2017 atanga Assembly Budget session neih tan turah Zirtawpni thleng khan zawhna (starred question) 310 leh ziaka chhan chi zawhna (unstarred question) 69 bakah sawrkar bill 1 a lut tawh. Assembly Secretariat thawktute hnen atanga Zalen thudawn danin bill pakhat lut hi Revenue department atanga lut 'The Mizoram (Land Acquisition Rehablitation and Resettlement) (Amendment), Bill 2017' a ni a, hei bak hi bill lut dang a la awm lova. Paper lay tur 10 leh private member resolution 48 a lut tawh bawk. Session tanni hian Governor in thu a sawi ang a, a tuk ni 15.3.2017 ah session neih kar laka boral MLA pathum Zosiama Pachuau, C.Lalruata leh Jayalalitha te sunna hun hun hman zawhah zawhna leh chhanna hun hman a ni ang a, Governor thusawia lawmthu sawina motion sawi hovin pass tum a ni ang. Ni 16.3.2017 (Ningani) ah Finance Minister in kum 2017-2018 Mizoram budget leh kum 2016-17 a sawrkar sum dilbelhna 'supplementary demand' a pharh ang a, Zirtawpni ah private member resolution sawiho a ni ang. Ni 20.3.2017 (Thawhtanni) ah supplementary demand leh budget a tlangpuia sawihona neih a ni ang a, ni 21.3.2017 atangin Minister hrang hrangte demand sawiho tan a ni ang. Speaker hova Business Advisory Committee in ruahmanna a siam dan chuan session hian ni 30.3.2017 (Ningani) thleng a awh dawn a ni.