Aizawl: March ni 13,2018 atanga neih tan tur Mizoram Legislative Assembly session ah Zirtawpni thleng khan zawhna chhan tur starred question 24 a lut tawh. Speaker hova Business Advisory Committee in ruahmanna a siam dan chuan session tan ni hian Governor in thu a sawi ang a, ni 14.3.2018 (Nilaini) ah session neih kar laka MP leh MLA boralte sunna leh Governor thusawi a lawmthu sawina motion te sawiho a ni ang. Ni 15.3.2018 (Ningani) ah Finance Minister Lalsawta'n kum 2018-19 budget leh sawrkar kum kal meka sum dilbelhna te a pharh ang a, ni 16.3.2018 (Zirtawpni) ah zawhna leh chhanna bakah private member resolution te sawiho a ni ang. March ni 19 leh 20 ah te budget sawihona neiin ni 21.3.2018 atangin Minister te demand sawiho a ni ang a, ni 29.3.2018 (Ningani) thleng a awh ang.