Aizawl April 22, 2023: Vawiin khan Dy. Chief Minister Tawnluia chuan Tanhril Setlak rama Urban Development & Povery Alleviation (UD&PA) hnuaia SIPMIU hmalakna 'Augmentatio of Water Supply and Construction of 37 MLD Water Treatment Plant' chu a hmunah tlawhin, hnathawh dan leh project dinhmun te enfiahna a nei.

Dy.Chief Minister hi SIPMIU Director Lalrohthanga leh official dang ten lo dawngsawng a, SIPMIU Director hian project din hmun tlangpui leh hmalakna kal mek te sawifiahna a nei a. Hnathawh zawh tep tawh a nih thu sawiin, tui pump khawl chawmtu tur 33 KV line Sihhmui atanga kal tur chu peihfel loh deuh a nih thu te, tui pipe phum tur Hunthar-Chanmari West-ah 100 meters vel a la awm thu sawiin, project hian kum 2033 thleng Aizawl khawpui tui mamawh a phuhru tura ngaih a ni, a ti. 

Tawnluia chuan SIPMIU-te hmalakna leh inpekna chu fakawm a tih thu a tarlang a. Tui hi pump theih anih hnuah pawh a sem chhuahna (distribution) lamah uluk taka hmalak zel a ngaih thu sawiin, felfai taka hnathawh zel anih theih nan theihtawp chhuah a ngai dawn a ni, a ti. Reilote ah Aizawl khawpuia cheng ten tui thianghlim tam zawk an dawng thei dawn a, tui harsatna chuan ziaawm lam a pan thuai dawn a, a lawmawm hle a ni, a ti. 37 MLD Water Treatment Plant chu Aizawl mipuite nghahfak tak a nih thu a tarlang a, mipuite beisei ang taka tha leh chhawrtlak anih theih nan project khawihtu leh enkawltu SIPMIU leh Contractor-te chu uluk leh tha taka hnathawk chhunzawm zel turin a chah nghal bawk a ni.

37 MLD Water Treatment Plant-hi Aizawl khawpui tana tui thianghlim lakna tur hmun thar niin Aizawl hmar veng te chawm tura duan a ni a. Aizawl Greater Water Supply Scheme Phase I&II aiin a tui pump chhuah theih zat a tam zawk a. Phase I&II hian nitin tui thianghlim litre maktaduai 28 atanga 34 bawr vel a pump chhuak thei a. 37 MLD Water Treatment Plant-hian nitin tui thianghlim litre maktaduai 37 pump chhuak thei tura ruahman a ni.