ZALEN September 20, 2024 : Seventh-Day Adventist Church mi leh sa te chuan RTI atanga chhanna an dawn atangin Mizoram sawrkar-in sakhuana thilah inthliarna a kalpui nia an ngaih thu an sawi a, Sunday chu mi tam zawkte inkhawm ni anih avanga sakhua tlem zawkte sawkar hmunhma hman phalsak an ni lo chu an hriatthiam loh thu an sawi a, a chhan hriat an duh.

Seventh-Day Adventist lam atanga thudawnna chuan Sunday atana field tum hnih an book tawh chu an cancel sak a, an dilna pakhat phei chuan phalna order a chhuak vek tawh a ni a ti. Heng phalna pek tawh hi cancel sak an nih chhan hi hriat tumin Mizo Conference-a hnathawk leh Kohhran mi pakhatin RTI hmangin zawhna hi an siam a. Sunday-a hman an phalloh chhan chu sawrkar chawlh a nih vang an ti a, mahse sawrkar chawlh dang ah khan hman an phal tho si a, Sunday bik an khuahkhirh tih chu an zawhna a nih tih a sawi.

RTI zawttu pakhat zawk, Lalmuansanga Khiangte, Associate Director, Communication Department, Mizo Conference of SDA chuan, "Sawrkar property ni si minority ten sakhuana thil avanga an hmang ve thei lo hi a mak ka ti a. Holiday avanga hman an phal lo a nih chuan Mizoram sawrkar property zawng zawng hi Holiday ah hman phal lo law law rawh se. Sunday-a hman phal loh hi kan fundamental right nen a inkalh tlat a. Sakhaw tlem zawkte rahbehna a ni," a ti.

Seventh-Day Adventist Church te hian Pathianni-a sawrkar hmunhma hman phal a nih loh loh dan leh a chhan vawihnih an zawt a, July 15, 2024-a chhanna an dawn chu a hnuai mi ang hi a ni.

1. Mizoram sawrkar enkawl, field leh hall hrang hrangte hi Sunday niin hman theih a ni em?

Ans : Sports & Youth Services Department in a enkawt field leh hall te hi Mizoram Sawrkar hnuaiah Sunday hi chawlh a nih angin hman theih a ni lo.

2. Hman theih a níh loh chuan eng dan tlawh chhana hman phal loh nge a nih?

Ans: Mizoram Sawrkar hnuaiah Sunday chawlh a nih angin, hman phalna pek thin a ni lo.

3. Tunhnai kum 2 chhung hian sunday ni a field/hall hman phal vek tawh mah se, YMA/Kohhran/Local Council Pressure avanga cancel sak leh a awm em?

Ans. Tun hnai kum hnih chhung hian sunday a field hall hman phalna pek a awm hriat a ni lo a chuvang chuan cancel tur a awm lo.

4. Heng cancel takte hi eng dan tlawhchhana cancel nge a nih?

Ans : NA

September 17, 2024-a chhanna an dawn chu a hnuaia mi ang hi a ni.

1. Pathianni (Sunday) hi sawrkar holiday a nih avangin sawrkar enkawl Hall leh Field te hman phal a ni lo a. Inrinni (Saturday) ah hian hman phal a ni em? Tin, Gov't Holiday hrim hrimah hman phal loh a ni tho em?

Ans : Aw ni e. Government Holiday dangah te hian a remchan dan anga hman phalna pek thin a ni.

2. Inrinni ah hian hman phal bik a nih chuan hman phal bik a nihna chhan min hrilh thei em?

Ans: Inrinni ah hian hman phalna pek anih bik nachhan a awm lo, Pathianni (Sunday) tih loh Government Holiday danga hman phal anih ang thovin Inrinni-ah hian hman phal a ni.