ZALEN, Nov. 17, 2024: Kawng rualrem lova bike intlansiakna, MRF MoGrip Supercross Championship kal mekah Shaun Lalremruata Chhangte chuan Round 5-naah dawhsan a lawn phak leh ta a, intihsiakna kal meka podium a lawn vawi thumna niin India No. 3 a ni mek tawh.

College Veng, Aizawl tlangval, Shaun-a hian MRF MoGrip Supercross Championship round ruk intlansiak turah hian Private Expert Class-ah Bhopal, Madhya Pradesh-a October 27, 2024-a Round 3-naah 2-na niin Round 5-na, Pathianni kal taa Pune-a intlansiakah 3-na a lo ni tawh bawk.

Bengaluru, Karnataka-a Pathiannia Round 5-ah hian Shaun-a hi class pathumah inlanin Private Expert Class-ah 3-na a ni leh a, a zawnin dawhsanah a lawn thei.

Mizoram atanga hetiang inelnaa tel hmasa ber, Shaun-a hi Pathiannia an intlansiak hma, Inrinni zana National Supercross Championship Overall Official Result tihchhuahah No. 3 a ni mek a, Pathianniah result tha a neih leh avang hian a thar chhuakah chuan a danglam theih beisei a ni.

Kum 23 mi, Shaun-a hi intihsiak kal meka Round 6 hmachhawn leh turin a inbuatsaih zui nghal a, round hnuhnung ber hi Cochin, Kerela-ah November 30, 2024 zanah neih a ni ang a. December 4-a haw turin a inruahman. 

Bengaluru-a an intlansiaknaah hian Mizo awmten an tawiawm tha a, amah pawhin lawmthu sawiin Mizoram leh hmun hrang hranga lo tantu leh tawngtaipuitute chungah lawmthu a sawi bawk.