ZALEN November 6, 2024 : Mizo Hnam Run-ah Sinlung Hills Council (SHC) General Election vawi 2na inthlan result-ah MNF-in hnehna a chan avangin vawiin khan Pathian hnena lawmthu sawina hun an hmang. MNF President Zoramthanga chuan bukin an awm a, lawmthu sawi theia an awm chu a lawmawm, tiin Pathian remruat vek a nih thu a sawi.

Zoramthanga chuan, "HPC (R) nena kan thawhhonaah lawmthu sawi theia kan awm hi a lawmawm hle. Inthlan laia rim taka thawktute chungah lawmthu kan sawi," a ti.

Zoramthanga chuan, "MNF an tla, an tih hian a tlak chhan kan sawi thin. Chu mi, kha mi vang chu a ni, NDA-a kan tel vang a ni tihte an sawi thin. Amaherawhchu, MNF hi Pathianin min puihna avanga ding chhuak chho a ni a, kum 63-naah pawh party lian tak niin kan la nung a ni. Vawi hnih khat inthlan hi Pathian ngaih pawimawh ber a ni lo. A changin min dah sang a, a changin min dah hniam thin a ni zawk."

"Party dangte chu an ral zel. Tuna ZPM sawrkar hmang hian Pathianin engtinnge MNF hi min humhalh a tum? Kum 60 chuang min hruaitu hian kawng lakah min kalsan lo ang. A remruatna angin kan kal a, a thiltum tihlawhtling turin min hum zel ang. Kan thuthlung innghahna - 'Pathian leh kan ram tan' tih hi i zir zel ang u," a ti.

He hunah hian SHC Bial 12-a inthlan report (MNF 5 + HPC'R 2) tawi ngaihthlak a ni bawk a - MNF Vice President Lalchhandama Ralte, MLA chuan a bial Tuivawl (MLA constituency) chhunga SHC Bial 6 awmnaah MNF-in Bial 5 a lak vek thu a sawi a. Bial pakhat - New Vervek erawh thil fel fai lo deuh a awm avangin State Election Commission kutah a la awm tih a sawi.