India hmarchhaka band intihsiakna lian leh ngaihven hlawh ber pakhat ShiRock-ah Mizo band tha The Prophets te chu pakhatna an ni. 'Biggest Rock Contest in India' an tih hial ShiRock band contest hi India rama band tha ber berte intihsiakna niin, Inrinni zan khan result puan a ni a, Mizo band ten lawmman pakhatna laiin cheng nuai sawm (10 lakhs) an dawng a ni. 

ShiRock hi India rama band tha ber berte inelna a ni a, audiotion pawh an uluk hle. India ram hmun hrang hrangah audition hi neih a ni a, The Prophets te pawh hian May 17, 2022 khan Guwahati-ah audition an nei. Audition paltlang band tha ber ber 16 ten final an lut a, a tawpah The Prophets te an thiam ta ber a ni. 

Tun tumah hian The Prophets hi an original line up-in an thawk chhuak lo a, an vocalist Ronnie Lalrinmawia hmunruak chu Frederick an a luah. ShiRock bika an line-up chu - Frederick (Vocals), Eric Renza (Guitar), Gordon Hnamte (Bass), Samuel Chawngthu (Keys) leh Mamawia Colney (Drums) te an ni a, Samuel Chawngthu chuan mimal lawmman Best Keyboardist a la a ni. 

He festival-ah hian cultural event, artifact, game, music leh food stall te buatsaih thin a ni a, chung zinga ngaihven hlawh tak chu music huanga ShiRock hi a ni. ShiRock hi band intihsiakna niin, ram chhunga band tha ber ber an inlan thin - a tawp zanah international band tha an perform thin bawk. Kumin hian British metal band Monuments te an inlan a, ShiRock winner The Prophets te an perform bawk.

The Prophets Line-up
Frederick - Vocals
Eric Renza - Guitar
Gordon Hnamte - Bass 
Samuel Chawngthu - Keyboard
Mamawia Colney - Drums