DOWNLOAD OUR APP

Read latest news on your phone
app-store
Si hnih an phurh hnuah League Champion turin goal thum nen Cityzen te an rawn kir
May 23, 2022

Season kharna inkhelhah Manchester City chuan Premier League title chawi turin chak ngei an mamawh laiin minute 68-na thlengin si hnih an la phur. Ball possession-a 71% lai nei chungin goal an thun thei tlat lo. Liverpool an champion tawh mai dawn emaw tih hnuah minute 5 chhung lekin City hian goal 3 rawn thunin ropui takin an rawn kir a, an champion zui. 

Beiseina aiah beidawnna
Kum nga chhunga a vawi li nana Premier League nomawi chawi leh turin City dinhmun a tha a, fans lam pawhin beiseina sang tak nen phur takin inkhel an thlir. An player te enin table mawng lama awm  Aston Villa chu an hneh theih ngei an ring. Mahse, an rin angin thil a kal lo, an beiseina te chu beidawnnain a rawn thlak a, an mang a ang hman.

Etihad Stadium-a inkhelhah hian, tun season-a an game hnuhnung ber turah City hian point khat chiahin hma an hruai a, a awmzia chu Liverpool-in an hmachhawn Wolves an hneh hlauh chuan Pep Guardiola leh a pawlte hian Aston Villa chu draw mah se Premier League title an hum thei dawn lo.

Minute 68 chhungin goal an thun lo a ni satliah lova, goal hnih an chhuah zawk a ni. Champion turin minute 22 chhungin goal thum an thun ngei a ngai. City lam tantu entu mipui lam tan chuan beisei a bo tawh hle a, shot 24 zet an neih chunga 5 chiahin target a fuh thei mai chu an vanduai zan tih a chiang a, an si phurh sut turin an pawlte lakah beisei an nei sang ngam tawh lo tih a chiang a, City fans zingah ngui nghiaia field kotlanga in dawm kun hmuh tur an tam. 

Beidawng duh lo De Bruyne leh a pawlte
Inkhelh hmuhnawm takah hian minute 36-naah M. Cash-a'n Villa tan goal khatna mawi takin a tauh lut a, City lamin nawr viau thin mah se goal an thun thei tlat lo. An beisei loh deuhin counter attract hmanga bei letin minute 68-naah Villa lamin an goal hnihna Coutinho hmangin an thun leh.

Draw-in an tan awmzia a neilo tih hretu City player te an talbuai lo, an si phurh sut a, hnehna goal thun leh tur chuan an tan thil huphurhawm tak a ni tawh tih chiang takin hre mah se De Bruyne leh a nau ten tlawm mai an tum lo, an hneh let thei tih hriain an lama goal a luh pawhin phur leh tha tho turin an infuih zawk a, ngui leh chau hmel hmuh tur awm lovin theih tawp chhuahin an bei let. 


Danglamna thlentu substitute 
City coach Pep Guardiola'n Bernardo Silva la chhuakin Ilkay Gundogan a dah lut bakah Sterling leh Zinchenko te a luh tir bawk a, anni pathum hian inkhel hmelhmang an rawn thlak dawrh a, goal lamah an hlauhawm phah bakah trophy an chawi theih phah.

Villa coach Steven Gerrard-a'n goal pawimawh khungtu Coutinho chu goal a thun hnu rei loteah a lak chhuak ve bawk. Coutinho a lakchhuah atanga minute ngana vel lekah lut thar Gundogan chuan City tana goal khatna a rawn thun nghal a, minute 77 naah Rodri-a'n an goal hnihna a rawn thun ve leh. City lam an phur tulh tulh a, minute thum hnuah Pep-a'n Silva aia a rawn dah luh Ilkay Gundogan ngei mai chuan a goal hnihna leh an chakna goal a rawn thun leh ta. Minute nga chhung leka Cityin goal thum ngawt an thun thei mai kha thil mak tak a ni.   

Inkhelh dang leh an dinhmun
Champion beisei Liverpool lamin si khat an phurh hmasak zet hnuah an hmachhawn Wolves chu Sadio Mane, Mo Salah leh Andrew Robertson goal hmanga hneh letin 3-1 in an chak a, mahse anni aia point khata sang Manchester City point khat-a phak lovin pahnihna an ni. Pathumna Chelsea hian Watford 2-1 a hnhin game 38-ah point 74 an nei a, Tottenham chuan si nga faia Norwich hnehin point 71 an hmu a, palina an luah thung.

Everton 5-1 a hnehtu Arsenal chuan point 69 hmuin 5-na an luaha, season tharah UCL khel phak lo chiahin Europa League an khel ang. Si khat faia Crystal Palace laka tlawm Manchester United pawh Europa an khel phak ang a, Point 56 neitu West Ham United chuan Brighton hneh loh mah se Europa Conference League khel phak turin pasarihna an ni phak. 

A mawngphah pathum Burnley, Watford leh Norwich City te nakum season-ah kan hmu dawn lo va, relegate thei dinhmuna ding Leeds United chuan Brentford 2-1 a an hneh vangin season tharah Premier League an la khel bawk ang. 

Premier League 2021-22 khaikhawmna: 

Champion : Manchester City

Season thara Champions League khel tur:
Manchester City
Liverpool
Chelsea
Tottenham Hotspur

Europa League khel tur club:
Arsenal
Manchester United

Europa Conference League khel tur:
West Ham United

Relegate club:
Burnley
Watford
Norwich City

Inkhelh zawng zawn: 380

Goal thun zat: 1,071 (Match khat zelah goal 2.82 lut ang)

Goal thun tam:
Mohamed Salah, Liverpool
Son Heung-min, Tottenham
(Goal 23 ve ve an thun)

Goalkeeper tha ber:
Alisson, Manchester City
Ederson, Liverpool
(Clean sheet 20 ve ve an nei)

Mahni muala inhnehna sang ber:
Chelsea 7–0 Norwich City
(23 October 2021)

Manchester City 7–0 Leeds United
(14 December 2021)

Khual muala in hnehna sang ber:
Southampton 0–6 Chelsea
(9 April 2022)

Goal luh tamna ber match:
Manchester City 6–3 Leicester City
(26 December 2021)

Club chak zawn rei ber:
Manchester City (Matche 12)

Chak loh neilo zawn rei ber:
Liverpool (Match 19)

Chak nei lo zawn rei ber:
Newcastle United (Match 14)

Tlawm zawn ngun ber club te:
Brighton & Hove Albion
Leeds United
(Match 6 ve ve)

Inkhel entu tam ber:
Manchester United 1–1 Chelsea (Entu mipui 73,564)
(28 April 2022) 

Inkhel entu tlem ber:
Brentford 2–0 Arsenal (Entu mipui 16,479)
(13 August 2021)

Goal thun tam player te:
Mohamed Salah, Liverpool (23 goal)
Son Heung-min, Tottenham Hotspur (23 goal)
Cristiano Ronaldo, Manchester United (18 goal)
Harry Kane, Tottenham Hotspur (17 goal)
Sadio Mané, Liverpool (16 goal)

Midang goal thun tur siam sak (assist) ngah te:
Mohamed Salah Liverpool (13 goal)
Trent Alexander-Arnold Liverpool (12 goal)
Harvey Barnes Leicester City (10 goal)
Jarrod Bowen West Ham United (10 goal)
Mason Mount Chelsea (10 goal)
Andrew Robertson Liverpool (10 goal)

Goalkeeper clean sheet ngah te:
Alisson Liverpool (20 match)
Ederson Manchester City (20 match)
Hugo Lloris Tottenham Hotspur (16 match)

May ni 22, 2022 Pathianni zan inkhel result

    Arsenal     5 - 1 Everton
    Brentford     1 -2 Leeds
    Brighton     3 - 1 West Ham
    Burnley     1 - 2 Newcastle
    Chelsea     2 - 1 Watford
    Crystal Palace 1 - 0 Man Utd
    Leicester     4 - 1 Southampton
    Liverpool     3 - 1 Wolves
    Man City     3 - 2 Aston Villa
    Norwich     0 - 5 Tottenham


2021-2022 table   
Team             Play    GD    Pts
Man City         38    73    93
Liverpool        38    68    92
Chelsea           38    43    74
Tottenham      38    29    71
Arsenal           38    13    69
Man Utd         38    0    58
West Ham      38    9    56
Leicester        38    3    52
Brighton        38    -2    51
Wolves           38    -5    51
Newcastle      38    -18    49
Crystal Palace 38    4    48
Brentford        38    -8    46
Aston Villa      38    -2    45
Southampton 38    -24    40
Everton           38    -23    39
Leeds United  38    -37    38
Burnley           38    -19    35
Watford          38    -43    23
Norwich         38    -61    22

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh