Inter Milan chuan Champions League final thleng turin rahbi pawimawh tak an rap kai ta a, khawpui khata an awmpui leh khelmual an tawmpui, AC Milan chu Milan derby-ah mikhual zawk ni chungin si hnih faiin an hneh a, karlehah goal hnih nei sain an mikhual ve thung ang.

Milan derby khelh tur hi an intum dawn tih a chian atangin Italy-ah chuan titi lian ber pakhat a tling a, San Siro-ah mi 80,000 vel zet hmaah an inlan ta a. Inter chuan tha zeta bul tanin minite riatna lekah Edin Dzeko chuan goal a thun nghal.

Khelmual an intawma Nilaini zan bika mual neitua tang zawk, Milan tantute an ngawi nghal thuap a, mual neitu zawk an nih angin Inter tantute an tam tam hneh hle.

Minute thum lek a liam leh a, Henrikh Mkhitaryan chuan Federico Dimarco thawhrah atangin Mike Maignan a pet khum leh bawk.

Mikhual zawk an tlangnel zui zel a, Hakan Calhanoglu chuan ban a tihper leh dawp a; mahse, penalty an hlawh chu referee Jesus Gil Manzano-a’n a ennawn hnuah sut lehin Lautaro Martinez chu a tlu der a ti zui ta hlauh.

Inter hian second half-ah an khelh dan tidanglamin goal hnih an neih sa hum tumin an inveng a, Milan pawh tang tharin Sandro Tonali chuan goal kham a tihper.

Goal erawh an thun thei ta lo va, Inter chu final lut turin dinhmun thaah an inchhawp zui ta a. Thawhlehni zanah San Siro-ah bawk an inkhel leh ang a, a chak zawk zawkin Manchester City leh Real Madrid inkhela a chak zawk an hmachhawn zui ang.

Inter hi European champion vawi thum ni tawh a ni a; mahse, kum 13 liam taa an champion hnuah final an la lut leh lo va, tun hi an thlen thui leh ber a ni.

Milan hian semifinal an luhna kawngah Tottenham leh Serie A champions Napoli an lo hneh tawh a; mahse, Inter lakah erawh an che ropui thei lo va, second half-ah pawh ziaawm deuhvin lang mah se minute 81-a Junior Messias pet an lo dan kawi chu goal zawna an pet hmasak ber a ni chauh.

Coach Simone Inzaghi chuan si hnih faiin hma hruai zawk tawh mah se final lut turin hna an la ngah tih a sawi.

“Goal hnih aia tam thun thei tur kan ni a, eng pawh ni se inkhel ropui tak a ni. Round eng eng emaw kan paltlang tawh a, tunah pawh hma kan hruai mek a. Second leg-ah chuan kan fan-te an awm tawh dawn a, kan lo suangtuah thin chu a taka chantir turin tih tur kan la ngah,” a ti.

Goal hmahruai thuntu, Dzeko pawhin chu inthlahdah a thiang lo tih a sawi a. “Result tha tak kan nei ngei a; mahse, khelh tur kan la nei a, kan fan-te nen kan ni tawh ang,” a ti.

“Team tha an nih avangin kan fimkhur a ngai a; mahse, vawiin anga ka chet chuan kan tlang ang,” a ti.

Milan boss Stefano Piolo chuan an chet danah a lawm lo hle a. “Second leg-ah tha zawka khelh kan tum ang. Inkhel kha tactic leh rilru lamah kan tha lo. Second half atangin bul kan tan ve chauh a ni ber a, chance pawh kan nei zui,” a ti.

“Zanin aia danglama kan chet ngei a ngai dawn a. Ka nauten pawi an ti em em vek a; mahse, lehthal turin kan tang ang,” a ti.