Aizawl; New Siaha mi pahnih, C. Biaksuii (kum 48), Bablu Talukdar (37) te leh B. Lalthafamkima (kum 22), Lungpher, Lawngtlai district-te  March 22, 2023 zana Mizoram leh Myanmar inrina bul, Myanmar ram chhunga thia chhar an nih chungchangah pawikhawihtu man an la awm lo nia thudawn a ni a. He thil thleng vang hian Siaha district chhunga Mizoram leh Myanmar inkalpawhna chu khar chhunzawm zel a la ni.

Siaha-a Mara Thyutlia Py (MTP) hruaitute hnen atanga ZALEN thudawn danin, Mizoram mi pathum rawng taka thah an nih chungchangah pawikhawihtute man an la ni lo a, international boundary kal kân ngai a nih avangin hmalakna a chak thei lo.

He thil thleng vang hian MTP hmalaknain Siaha district chhunga Mizoram leh Myanmar inrinate chu duty indahin khar vek a ni.
 
Media hrang hranga tar lan tawh angin C. Biaksuii leh Bablu Talukdar te chu March 19, 2023 zing dar 4 vel khan Siaha atangin mi pakhatin a hruai chhuak a, a hruai chhuaktu hi an hmelhriat tha tak a ni. B. Lalthafamkima khalh, TATA Ace hmangin ramri lam an pan a, zing dar 7:30 velah ramri bula khua, Ainak, Lawngtlai district an thleng.

Ainak khuaah hian Myanmar lam atanga kal damlo hruai tur anga insawiin ramri lam an pan a, chuta tang chuan an chin hriat zui a ni ta lo a ni.

March 22, Nilaini zanah C. Biaksuii leh B. Lalthafamkimate chu thiin hmuh an ni a, a hnuah an awmna atanga metre 50 velah Bablu Talukdar pawh thiin hmuh ve leh a ni.

He thil thleng chungchangah hian Siaha Police Station-ah IPC Section 302/363/364A/341/342/343/346/379 leh Foreigners Act section 14 leh MV Act section 181 te hmangin thubuai ziah luh a ni.