LBS Suzuki All Mizoram Inter Village Football Tournament khelh mekah semi-final hmasa zawkah Sialhawk leh Ramhlun North an inkhel a, hun pangaiah 2-2 a an inhnehtawk hnuah extra time an khel leh a, goal a luh belh lovin penalty chhuih a ni a, penalty-ah hian Sialhawk hmaah inkhel thiam veng Ramhlun North an hlun zo ta lo. 

 ‘Keih keih’ maia tih au hla  larpuitu Sialhawk mipui te’n an player te auh phur nan Sialhawk Siakhawl tiin AR Lammual khawk rum rum khawpin an au rual dual dual a, player te pawhin theihtawp an chhuah tih a chiang. Ramhlun North lam fans an diau bik lo. Khawpui chhung team dam awmchhun an ni bawk a, champion tumin theihtawp an chhuah tih a hriat. 

Kawr pawl leh kawr var khah chukna Lammual inkhelh pum pui thlirin Sialhawk lam an chungnung deuh zawk a, goal an thun teuh thin hle.         Inkhelh tan atangin team hnih te an innawr tawn a, Sialhawk lam nawr a na zawk hret. Chutia an innawr tawn mek lai chuan tuna North East United tana khel mek Sialhawk captain R. Laldanmawia hmangin minute 9-na lekah Sialhawk-in hmahruaina goal an khung. Minute 7 lek a liam tihin Sialhawk lamin an nawr phei leh a, Crespo a ball pek chu Danmawia’n goal lamah a khalh phei a, goal-ah a pet tawh mai dawn emaw tih laiin mahni hmasial lo takin a thianpa a siam sak a, goal an khung leh. Mahse, linesman-in offside a lo phar a, goal-ah pawm a ni ta lo.        

Sialhawk lamin goal an thun teuh thin hle a, Ramhlun North lam ball nawr pawh a nep bik chuang lo. League ang deuha mumal taka inkhelh kalpui thin Sialhawk lam khel a mawiin awmzia a nei a, mual sir lam atanga Danmawia goal shot chu goal zawnah a kal lo hlauh.

Ramhlun North lam hian counter hmangin an nawr thut thin a, an hlauhawm teuh thin hle. Captain V. Lalchhuanawma a khel tha a, mahse a duh angin target zawnah ball a pet hleithei lo. Half-time hma minute 32 naah Ramhlun North player K. Lalrosanga chuan through ball tha zet mai um lutin a tlan chak zar zovin an si phurh a sut. Rosanga finishing tawi zet hmangin Ramhlun lamin tlawm mai an tum bik loh zia an lantir a, a kotlang lama kawrvar ha Ramhlun fans lam an phur thar. Minute 33-ah Famkima ball cross Pekhlua’n a tauh goal teuh hle. Mahse, chawlhlawk hmain goal a luh belh thei ta lo. 

Second half tan a ni a, team pahnihin goal an thun teuh thin hle. Ramhlun North tan minute 70-naah Lalpekhlua’n goal tha zetin a shot a, an lo dan sak mah se a rawn per let leh chu pet nawn lehin Sialhawk keeper-in a dang nawn thei lo. Si phur hmasa Ramhlun North lamin 2-1 in hma an hruai ta zawk a, Sialhawk lamin tha an thlah lo, free-kick atanga ball kal chu keeper Laltanpuia'n lo save mahse mual dinglam sirah  ball a per a, Ramhlun player pahnih inkar atangin Rotluangliana’n mawi tak maiin a bin a, goal mouth zawna a lut tawh chu chiang leh zuala a luh theih nan hnai set sawt atangin Lalmuankima'n lo tauh lut a, hun tawp dawn  minute 87-naah Sialhawk-i’n an siphurh an sut leh thei hram a, 2-2 a ni ta. Goal dang luh belh lovin hun a tawp. 

Extra time khelh chhunzawm a ni a, Sialhawk bawkin ball an bawh na zawk a, Danmawia ke hmui tum nise Sialhawk lam hian penalty an chhuih a ngai kher lo mahthei. Penalty area chhunga Ramhlun North defender ban a pet per a, tlang phei ngat se, a goal ngeiin a rinawm. Mahse referee in penalty a pe lo. Goal hlauhawm tak tak nei zui mahse Sialhawk lam hian goal-ah an chantir thei lova, Sialhawk forward Crespo-a long shot pawh a goal teuh hle. 

Extra-time zawh hma deuh hian penalty chhuih turin team te an inring a, substitute atangin penalty chhuih thiam an rawn luh tir hlawm. Penalty hi Ramhlun North lamin an chhuih hmasa a, an player pahnih-in an chhuih goal loh hnuah Danmawia rawn pen chhuakin chakna goal hi a rawn khung a ni.