ZALEN October 18, 2024 : Centre for Environment & Social Justice (CESJ) chuan, kumtina Mizoramin a mikhual thin, Sialsir (Amur Falcon/ Falco amurensis) sava a mikhual leh dawn a. Mizorama an cham chhunga hlau lo leh thlabar loa hahdam taka Mizoram leilunga an chawlh theih nan CYMA / YMA Branch, Mizoram Village Council, All Deputy Commissioner / District Magistrate hnenah ngena an thlen.

CESJ chuan heng save te hi lo humhim leh Mizoram hi chawlhna tlak a nih theih nan a lo enkawl hi a Mizo a, a Kristian bawk kan ti a. Sialsir sava te him nan hmala turin, CYMA hruaite hnenah YMA Branch zawng zawnga hrilhhre turin an ngen a. President, Mizoram Village Council hnenah Mizoram puma VC zawng zawngte hnena hrilhhre turin an ngen bawk.

Mizoram district zawng zawnga Deputy Commissioner / District Magistrate te hnenah an district huam chhunga Sialsir sava leh nungcha dangte thahna, silai, sarawkherh, air gun leh thang te khap turin an ngen bawk a ni. Tin, Mizoram mipui zawng zawng hnenah heng kan mikhual, thlahnih emaw chauh cham turte hi dimdawi vek turin kan ngen nghal a ni.  

Sialsir [Amur Falcon / Falco amurensis] te hi sahel ei chi savate zingah chuan hriat theih china pem thui ber an ni. An thlahtute lo chhuahna khawchhak lam hla tak- Mongolia, China leh Russia ram atangin thlasik khawvawt tlan sanin South Africa ah an pem thin. Mongolia, China leh Russia ramah te hian no neiin an awm a, thlasik a lo thlen dawn chuan South Africa lam panin an zin kawng an zawh tan thin. Khuangchawi thla laihawlah hi Mizoram pawh an lo thleng tawh thin a ni.

Sialsir sava ten zin kawng thui leh hautak zet mai an zawh chhuah theih nan chakna an mamawh hnem hle mai a; in ei thau a ngai a ni. An zin kawng atana chakna khawlkhawm tur chuan chaw tha tinreng an ei a ngai a, chu mi atan chuan Mizoram leh a chhehvel (northeast India) ah an rawn fuankhawm thin a ni. Phingphihlip leh rannung dang an ei ber a, savate deuh an man ve zauh thu hriat tur pawh a awm bawk.

Pawltlak thlaah hian Mizoram an chhuahsan fel thawkhat tawh nia hriat a ni. Mizorama an awm chhung hian rannungte ho eiin chakna an chhekkhawl thin.