Mizoram hi tlangram, ruahtui tlak tam kum chuan leimin leh tuilian thlen theihna ram a ni a. Kuminah pawh ruahtui a tlak tam avangin Mizoram hmun hrang hrangah harsatna thleng a tam hle a. Disaster Manegement & Rehabilitation Department chhinchhiah danin May leh June thla chhunga ruahsur nasa in thil a tihchhiat hlutzawng chu nuai 6000 chuang niin an chhinchhiah hial a ni. Upa ten ruahtui tlak tam thla an tih mai 'Vawk hniakzawn thla' kan hmang mek a, kumdang ang anih chuan tun thla hi ruahtui tam ber thla a ni dawn a. Kan lo inbuatsaih lawk loh chuan kan ramah chhiatna nasa zawk a thleng thei dawn a ni. Kan hriattlan angin Mizoram chu ruahtui dawng tam ram a ni a, chumai bakah kan ram leilung a nghet tawk lova. Tlangram a cheng kan nih bawk avangin ruahtui a tam phei chuan leimin a tam thei hle anih hi. Heng chhiatna hrang hrang thleng hi fimkhur vangin kan pumpelh thei a ni. Mithiamte chuan vanduaina thleng hi fimkhurloh vang leh pumpelh theih a nih thu an sawi a. Kan ramah ngei pawh in kan sak dawnin kan fimkhur tawklo a, a rem ang angin a hlauhawm dawn leh dawn loh pawh sawi lovin kan lai vak vak mai a. Nakin lawka kan tana hlauhawm tur 'Mangkhawng' kan siamlawk a ni tih hriain mithiamte kaihhruaina hnuaiah ngei hma la thin ila, harsatna lo thleng tur kan pumpelh thei dawn a ni. A bikin Aizawl khawpui ah phei chuan mitinte kan him theihnan Aizawl Municipal Corporation (AMC) chuan insak kaihhruaina a siam a, he dan siam hi kan zawm that chuan kan zavaia himna tur a ni tih i hre thar ang u. Zirchianna atanga a landan phei chuan Aizawl khawpui hmun 98% hi hmun nghetlo leh hlauhawm a ni a, chuvangin hmundang aiin kan fimkhur zual a ngai bik lehzual a ni. Tarlan tawh angin kan rama chhiatna thleng tam ber hi tui luankawr mumal loh vang niin a lang a. Kan tui bawlhhlawh leh thli te a rem ang angin kan luantir mai mai a, chumai bakah tui luanna hmun tur chu bawlhhlawh paihnan te kan la hmang lehzel a. Tui luang mumallo hian harsatna nasa tak min thlen a ni. Tin, khawpui dangah chuan lei ti mintu nia an puh polythene chu Mizoram ah khap a nih veloh avangin kan hmang uar hle mai a. Hengte hi a tawih ve mai mai thei lo a, kum za tam tak tawih lova a awm thin avangin kan polythene leh sarang te hian leimin a siam bawk a, halral emaw a bika paihna hmun awm thei se a duhawm hle. Hei bakah hian ruahtui khawlna tha kan nei lo hi kan tihfuhloh zinga mi a ni a. Ruahtui khawlna hi nei tha ila, thal ah kan buai dawnloh bakah a duh duhna hmuna tui luang tur a ziaawm thei ang. Engpawhnise tlangram, ruahtui tlak tamna hmun leh leilung nghetlo kan nih avang hian kan fimkhur lehzual a pawimawh tih i hrenawn leh ang u.