Mizoram Board of School Education-in vawiina HSSLC result a tihchhuahah zaithiam Siampuii Ralte chu distinction-ah a pass! Sihphir tleirawl Siampuii Ralte hian Synod Higher Secondary School, Mission Vengthlang-ah zirna run a bel a, hostel-ahte awmin theih tawp a chhuah - a tawpah hlawhtlinna ropui tak a chang ta a ni. 

Siampuii hian nikum khan Mizo zaimi ten an ngaihhlut em em Thazual Award leh Lelte Award-ahte award a la a, kum naupangte ni mahse zai lamah sulhnu tha tak a hnutchhiah der tawh. Hming chher chho viau mah se zirna a dahpawimawh hmasa a, zai lam pawh a theih ang angin a bei ve zel. Tunah chuan uniform hak kal pelin college life a tawng chho ve thei dawn tawh a, rimawi lamah pawh nasa zawkin a inhmang chho theiin a rinawm. 

Zirna avanga hun eng emaw chen a reh vang vang hnuah tun hnai mai khan music video thar 'Leng Lerh' a tichhuak a, a YouTube chennel lamah pawh mi nuai khat chuangin an en leh der tawh a ni. Siampuii Ralte a kal leh zelna turah Zalen chuan duhsakna kan hlan e.