India foreign minister chuan Canadian Sikh hruaitu thah a nih chungchanga Canada nena an inhmuhmawhna chu US a tlawh tumin an sorkar hotute a hrilh fiah tih a sawi.

S. Jaishankar-a hian Zirtawpni khan Canada-a Sikh inlak hran tum pawl thlawptute awm dan chu a ngaihven dan hi US Secretary of State Antony Blinken leh US National Security Adviser Jake Sullivan te a sawipui tih a sawi.

Canadian Prime Minister Justin Trudeau chuan September 18 khan a sorkar chuan a chhuinaah June-a Canada-a Sikh hruaitu, Hardeep Singh Nijjar-a thattute chu ‘Indian sorkar agent nen inzawmna nei an ni thei’ tih an hmuh thu a sawi a ni.

“Blinken leh Sullivan hian US thlir dante an sawi a, ka hrilh fiah a, kan ngaihmawh dante pawh kan sawi,” Jaishankar chuan Hudson Institute-a hun a hmannaah a sawi.

“Kan inbiaknaah hian rah tha pawh a chhuah ngei ka beisei,” a ti bawk.

New Delhi chuan Ottawa-in Nijjar-a thahnaa inhnamhnawiha a puhna hi nasa taka phain ‘awm ang lo lutuk’ tiin a sawi.