School Education Minister Lalchhandama Ralte chuan zirlai ten rualkhai leh mumal zawka lehkha an zir theihna turin naktuk July 12, 2021 atangin sikul hawn anih dawn thu leh zirtirtu te'n mumal zawkin sikul atangin online class an kalpui tawh dawn tih a sawi a. Hri leng vanga zirna in hawn theih anih loh laia online class kalpui chu Mizoram a zirlai, mi nuai 3 chuang zinga 50% chauhin an chhawr tangkai a, a bak 50% dang chuan smart phone neih loh vang te, internet that loh vang te in, online class chu an chhawr tangkai thei lo tih a sawi a. Chuvang chuan zirlai zawng zawngin rualkhai zawka zirna an chhunzawm theih dan tur an ngaihtuah tih a sawi a ni.

Hripui avangin kum khat chuang zirna in te khar a ni tawh a, hetih chhung hian a remchan dan leh thiam ang angin zirna hi kalpui a ni a. State tam takah phei chuan Board exam te thulh a ni hial a, Mizoramah erawh chuan tluang taka neih theih a ni thung. Hri hian min kiansan mai dawnin a lang lova, hetia sawrkarin ruahmanna an siam ta hi a lawmawm a, mahse fimkhur hle erawh a ngai thung dawn a ni.

Education Minister sawi ang khian mipuite hi kan la rethei tlang a, onlice class kal tur pawhin chhungkaw tam tak chuan smart phone pawh kan la nei zo lo a ni. Hei mai ni lovin internet signal pawhin duhthu a la sam tawk lo hle a, khaw tam tak internet signal la nei ve lo an awm a. Heng mite tan hian a buaithlak zual a, exam ni khua pawhin signal awmna hmun, khua atanga hmun hla tak tak pan a ngaih chang te a awm hial a ni.

Online class hi thil thar a ni a, zirlai tam tak hian an hmang tangkai thiam lovin mi tam tak chu an inthlahdah hle niin a lang bawk. Zirtirtu ten smart phone kaltlangin zirtirna an pe a, zirlai tam tak chuan ngaihsak mang hlei lovin thildang te an tihsan mai mai a, thiamna tak tak an pawchhuak/zirchhuak lo niin a lang bawk. Onlien class atang ringawt hi chuan pass thin bawk mahse thiamna tak tak an nei lovang tih a hlauhawm hle.

Mizoram sawrkarin hri ziaawmna hmuna zirna in hawn a tum ta hi a lawmawm a, chutih rual erawh chuan hri hi mipuiah a darh tawh tih chiang takin a hriat a. Thiamna tak tak neih kan duh rual hian hri inkaidarhna hmanrua a ni thei a ni tih hriain fimkhur takin sikul hawn hi kalpui ngei ni teh se.