Aizawl: Mizoram sawrkarin school kai hun a sawn hma that zawkna leh that loh zawkna te zirchiangtu tur State level leh district level-ah din a ni dawn a, a enfiahtu tur committee hi thla 3 chhungin din a ni ang. Mizo Students Union (MSU)-in School tan hun sawn hma an duhlohna kal zelah nimin khan School Education Minister office ah sawrkar lam aiawh leh MSU aiawhte hi inbiain inremna an siam thei a. An inremna ang chuan ‘sawrkarin school tan hma chungchanga ruahmanna thar a siam chu tun Academic Session kal lai mek chhung atan hman phawt nise, chutih chhung chuan a that zawkna leh thatloh zawknate uluk taka enfiah a, kum lokal zel tur atan ruahmanna siam nise. Thla thum chhungin a enfiahtu tur MSU aiawh telna state level leh district level-ah sawrkarin a din ang’ tih a ni. Sawrkar leh MSU ten inremna an siam theih tak avang hian April ni 28, 2015-a MSU-in Aizawl a kawng zawh neih an tum leh April ni 29 & 30-a Total Bandh neih an tum pawh an thulh nghal. Nimin vek khan MSU hruaitute chuan Aizawl Press Club-ah chanchinbumite an kawm a, sawrkar nen an inremna avangin MSU a tlawm tihna a ni lo tih an sawi. Lalrinhlua chuan, "MSU chuan school tan hun sawn hma hi a duh lo reng a, thuneituten min ngenna zahawm kan tih avang leh a enfiahtu tur ah MSU aiawhte kan tel dawn bawk avangin hetiang hian thutlukna kan siam ta a. Mipui tan theihtawpa beih zel kan tum a ni,” a ti. Sawrkar aiawh leh MSU inbiakna ah hian sawrkar lam atangin School Education Minister H.Rohluna, Parliamentary Secretary Joseph Lalhimpuia, Addl.Secretary, School Education Lalzirmawia Chhangte, School Education Director K.Lal- thawmmawia te an tel a. MSU lam hi an President PC Lalrinhlua'n a ho a ni.