ZALEN December 12, 2024 : Mizo Students’ Union General Headquarters Executive Committee Meeting vawiin-a thukhawm chuan kum 2024-25 Academic Session chhunga sikul thenkhatten an naupang thenkhat, zirna lama hnufual deuha an ngaihte, result tha, pass percentage tha duh vanga harsatna nei zirlaite chu hming leh sikul MSU hnenah hriattir vat turin an ngen.

MSU chuan, "Sikul hming chhiat hlauh avanga Sikul hminga exam tura form fill-up phalsak an ni lo hi pawi a ti a. Sikul hming chhiat hlauh avanga an zirlai naupang ngei ngeite pawh exam an phalsak lo chu sawrkar thupek bawhchhiatnaah leh Naupang chanvo chhuhsaknaah a ngai a, hetiang avanga harsatna nei zirlaite chu MSU (Ph - 7641941487/9863455822) hnenah an hming leh sikul hming hriattir vat turin Mizoram mipuite kan ngen a ni," an ti.