Aizawl: Nimin khan Science Teachers Association of Mizoram (STAM) huaihawtin sikul tan chungchang (school timing) inrawnkhawmna /sawihona neih a ni a, YMA-in a ngaia kal an duh laiin zirtirtu lam chuan tihtlai an duh thu an sawi. School timing chungchang sawihona hi STAM President C.Lalrosanga chuan kaihruaiin STAM Vice President Dr. R.Lalengmawia chuan sawihona neih a nih chhan a sawi. Hemi hnu hian RK Lianzuala kaihhruaina hnuaiah pawl hrang hrang ten school timing chungchanga an ngaihdan an sawi a, Central YMA chuan a ngai (dar 8 a tan) anga la kal a, en-chhin deuh hrih an duh tih an sawi a. MUP chuan an ngaihdan chu 50/50 a ni tiin MHIP chuan meeting-ah an la sawiho lo niin an sawi. Inrawnkhawm na a tel zirtirtu pawl hrang hrang aiawhte chuan sikul tan hma chu hmun hla zawk atanga kal zirlaite tan harsatna a siam nasa nia sawiin tan hma vangin zirlaiten zirna hun an nei tam chuang lo tih an sawi a, pum tha lo an tam phah niin an sawi bawk. Sikul tan hma vangin naupang zingah luhai, pumna leh luak an tam tih sawiin tlaia an ban hma vangin zirlai tam takin ruihhlo bakah inngaihzawnna kawngah nghawng tha lo zawk a nei nia an hriat thu an sawi bawk. Nimin inrawnkhawmna ah hian YMA, MUP, MHIP, MSU, zirtirtu pawl hrang hrang bakah sawm bikte an tel a ni. STAM-in nu leh pa, zirtirtu, zirlai, traffic police leh driver mi 4816 zawhna (Questionnaire) an neih atanga a lan danin zing dar 8-a sikul tan tha ti hi 1343 (27.89%) awmin tha ti lo 3250 (67.48%) leh ngaihdan nei lo 184 (3.8%) an awm a. Nu leh pa, zirtirtu leh zirlai mi 4695 te hnenah ‘naupangte hriselna a khawih pawi em?’ tih chu pawi ti 2161 (46.02%), pawi lo 2240 (47.7%) leh ngaihdan nei lo 294 (6.26%) an awm a. Nu leh pa 1896 te hnenah school tan hun atana an duh ber an zawhna chu dar 8 duh 172 (9.07%), dar 8:30 duh 670 (35.34%), dar 9 duh 851 44.88%) leh 9:30 duh 203 (10.7%) an awm a ni.