nAizawl: Sawrkar thupek angin Aizawl SP hnuaia Police station hrang hrangte chuan halpuah leh silai lem, a mu kapchhuak thei an dap chhunzawm zel a, hriattheih chinah silai lem 300 chuang an man tawh a, halpuah erawh man an la nei lo thung. Superintendent of Police, Aizawl thawktute hnen atanga Zalen thudawn danin silai lem leh halpuah hi dawr hrang hrangah an check thut thut thin a, halpuah man an la nei lo chungin silai lem erawh dawrkaiten kudam leh hmun danga an dah 300 chuang an mansak tawh niin an sawi. Police thuneitute chuan mipuiten thlamuang taka Krismas leh Kumthar an hman theihnan tuna force an neihsa bakah PHQ leh Battalion dang atangin sipai engemaw zat pawtkhawmin a tam thei ang ber chhun leh zanah patrolling neih an tum tih Zalen an hrilh a. Lirthei pawh a remchan dan angin Police station hrang hrang ten an check thu thut dawn nia sawiin driver te pawh zu an in leh in loh ‘breath analyser’ hmangin an enfiah thin tih an sawi bawk.