PC Laltlansanga

Vairengte leh Lailapur side ramri lam hi tunhma ai chuan tlemin hma kan sawn a. Kan hmasawn hretna lai chu, Vairengte daia auto rickshaw stand atanga a thlang lam tlang bawkte kha kan luah ta a. Lung vawmphak leka hmasawn ni mahila a lawmawm hle mai.

Chu kan hmasawnna chu tlem te mah se Assam a tithinur a. Kha tlang bawktea Mizoram police duty post siama Mizo IR police duty laite chu July  26 Thawhtanniah Assam police-ten an rawn hnawt chhuak a, duty post an luahlan a, silai an rawn hmetpuak bawk a, kan police-ten chhangletin inkahna a awm phah ta a. Ramri issue ah mellung thar kan phun a, a lawmawm ngawt mai.

He inkahna a silai puah hma lawka vai civil-ten Mizo motor an suasam lai te, Assam police lamin Mizoram police post an rawn chhuhsak teargas-a Mizote an kah pup pup laitea lo bei lettu Vairengte thalaite an fakawm tak meuh a. Huaisen taka Assam police kaptu kan police-te an va chhuanawm em! Mizoram sorkar hotute pawh, ‘Assam police-in silai an hmet puak hmasa a nih chuan chhang let ve ang che u’ tia kan police-te thu an pe hi an fakawm a ni.

Hetihlai hian Assam nena kan ramri hi Lailapur lam chauh kan buaina a ni lo a. Saihapui V te, hêtah lehlamah Aitlang lam te, Bairabi Zophai lam te, khawthlang lamah  Kanhmun bul Chuhvel, Thinghlun lam te, a dang neih neuh te pawh a la awm ang.

Ni 27 July  (Thawhlehni) khan kan hotute hnungzuiin  inkahna hmun kan tlawh a. Mizoram leh Assam police position inṭhat hleihzia a lang chiang a. Assam police tan chet ngaihna a awm hlawl lo a ni. Kan police te an fakawm takzet e.

Aitlang lam kan tlawh nghal a. He lam chu a dan a dang daih mai. Mizo chhungkaw tam tak huan thlai, hmanni lawka Assam police-ten an tihchhiatsakte kha an la awp zui tlat a. Kum tam tak kuhva leh hmunphiah hmuna an lo neih, kuhva kung sang pui puite chu Assam police-ten an lo camp hnan a. Helai hi Mizo thlam pariat vel lai an halsakte kha an ni a. An lainatawm hle.

Assam police-ho khan huan neitu Mizote hnenah ‘In sangha dilte hi sah rawh u engmah in chang tawh dawn lo’ te an ti a. An hmunphiah huan atangten an um chhuak a. An thlam an halsak a nih kha. Vawiin thleng hian an luahsak zui tlat mai.

Hetiang hi a nih vangin Aitlangah hian MAP  dah luh ve an ni a. Chutichung chuan Assam police-te hian an chhuahsan duh chuang lo va, inhnaih tein Assam police leh Mizoram police-te hi an duty a. Aitlangah thung hi chuan Lailapur lam nen a inletling hlauh a. Kan police tanhmun chu reilo te a hup beh vek theih anni a. Lunga vawm phak lek, a hnuai zawka tang an nih vangin Assam police hian an chhuk kah ve thung dawn a. Hmun thum vel atangin an kah rawn thei dawn bawk a. Inkap chiah se Mizo police-te chu belchhungsa an ni mai. Tun inkahna nen an dinhmun a inletling hlauh thei. MAP-te camp-na hi a rem lo takzet a ni.

Tun dinhmuna rilru tina tu chu, Aitlang rama Mizo lo leh huan tam tak, kum rei tak eizawn nana an lo hman tawh Assam police-ten an awmchilh reng khu a ni. Engtia tih zel chi nge ni ang?

Inkah hi ramri a fel loh a, kan ram chin kan neih hlen phah loh chuan awmze awm lova thisen luanna mai a ni a. Chuvangin, tuna silai puakah hian duhtawk mai tur a ni lo vang.  A pawimawh ber chu kan ramri dik tak kan neih let a ni a. Silai a puak a nih pawhin chumi a tan puak sela, puak thlawn lo rawh se.