ZALEN, Sept. 01, 2026: Silchar Truck Drivers’ Association-in an memberte Mizorama tlan lo tura an tih bakah state dang atanga lut tur truck an dan mekah 50 chuang tangkhang an awm tawh niin Zalen chuan thu a dawng.

Silchar-a truck khalhtute hian Pathianni zan dar 6:00 atang khan kawng hi an dang tan a, kawng dan avang hian hriat theih chinah Mizorama sumdawng leh truck-ten harsatna an tawh thu hriat a la ni lo.

Kolasib-a tipper pawl hruaitute pawhin Silchar lamah an member-te motor tangkhang an awm loh thu an sawi ve bawk.

Mizoram Merchants Association (MIMA) President P.C. Laldinthara chuan tun dinhmunah an member-ten harsatna an tawh loh thu sawiin hun rei zawk an dan erawh chuan thil thleng thei a nih thu ZALEN a hrilh.

Kolasib-a tipper pawl hruaitu pakhat chuan August thla laihawl khan Lailapur Truck Drivers’ Association nen an inbia a, dan anga Mizo leh hnam dang driver-ten balu an lak theih nan hma la turin an inrem niin a sawi a. Hetih rual hian Lailapur pawl hmalakna erawh an hriat loh thu a sawi.

Silchar-a truck khalhtu pawl hian balu phurten Kolasib district chhungah harsatna an tawh thin thu sawiin dan anga balu phurhte pawh kawng lakah mi thenkhatin tidingin an buntir a, ruakin an hawtir leh thin niin an sawi.

Hei bakah hian driver-te chuan vau mai bakah inhnuaichhiahna leh intihduhdahna an tuar thin niin an sawi bawk a. Balu phur mai bakah driver dangte tan pawh a him lo nia an hriat avangin Mizoram pana an tlan duh loh thu an sawi bawk.