ZALEN October 4, 2025: Mizoram House Silchar-ah vawiin khan Silchar Branch YMA hruaitute leh Minister pahnih K Sapdanga, Home Minister leh Lalnghinglova Hmar te chu an inkawm a, Silchar Branch YMA hruaitute hian an mamawh chi hrang hrang lo thlen bakah ruihlo vang leh sumdawna thil avanga an buaina te an lo thlen a, Silchar jail-ah Mizo tang 58 an awm mek thu an sawi.

Kum 2025 chhungin Silchar Branch YMA te hi Mizo hnam harsatna hrang hrang leh ruang buaipuiin vawi 60 chuang an che chhuak tawh a, heng avangte hian bungraw dahna tur an mamawh thu an lo thlen a ni. Ramri hnaiha awm an nih avangin ramri buaia tlan chhiatna tur leh mipui humhimna tur Hall an mamawh thu an lo thlen bawk. Silchar Branch YMA member hi 400 vel an ni a, an hruaitute chuan Ministry dangah pawh hmalak an lo tiam tawh thu leh a hmunhma pawh an enhopui thin thu an sawi a, a hlawhtlinna hmel an la hmu lo chu hrehawm an tiin ZPM Ministry ah beiseina sang tak an neih thu an lo sawi. 

Mizoram atangin sumdawng hmelhriat nei inti, phone atanga Silchar lam mi thianah siam a, ralkhat atanga pawisa inthawn, a bungrua dawng si lo case chungchang chu an buaipui tam ber thu a nih thu an lo sawi a. Kidnapped case hial pawh thleng tawhin tun dinhmunah ruihhlo kaihnawihah Silchar Jail ah Mizo 58 an tan mek thu an sawi bawk a ni. 

Heng an mamawh hrang hrangte hi Home Minister chuan a tul anga bawhzui a nih tur thu a hrilh a ni.

Home Minister K Sapdanga chuan, "Ruihhlo do beihpui kan thlak mek a, Mizoram leh Burma inrina khaw 22 ah Branch YMA te kan ngen a, anni nena thawkhovin heng khuaah te hian Police kan dah vek a, tunah chuan Aizawlah pawh ruihhlo a to sawt hlein kan hria, Assam nen kan inrinaah pawh hmalak tum a ni bawk," a ti. 

Silchar Mizoram House-a thawktute pawhin an mamawhte lo thlenin Mizoram Police, Silchar-a thawktuten Silai an kawl ngai loh thu leh Police hmalakna kawngah a thuanawp thu an lo thlen a, Police te hian office an neih loh avanga a buaithlak thu an sawi bawk.

Sapa chuan, Silchar Mizoram House ah hian SASCI atangin In sak belh a ni dawn a, Police duty post pawh a tel theih ngei a beisei thu a sawi a. Silchar-a MST bus station hlui chu ramri hung that leh lei chhun khah tha a tih thu a sawi a, House hmar lama ram awl chu tangkai zawka hman a nih theihna turin Silchar Mizoram House DRC Lalhmingliana, MCS chu a tul anga lo bawhzui a, proposal siam turin a ti bawk.