ZALEN November 12, 2025 : November Ni 8 leh Ni 9-a Blind Football Tournament, Greater Lion's Vision Cup 2025, Siliguri, North Bengal-a neih zawh takah, Mizoram Blind Sport Association hnuaia Mizoram Blind Football Team-te tel vein Mizoram team-te hian league match atang tlawm nei lovin champion nomawi an chawi. 

Greater Lion's Vision Cup 2025 hi Football Association for The Blind in Bengal (FABB) leh Lions Club of Siliguri Greater-te tangdunin a buatsaih a ni a, Indian Blind Football Federation hriatpuina (recognised) tournament niin, he tournament-ah hian State Pali - Jharkhand, Nagaland, Mizoram leh West Bengal-te telin league match-a khelh phawt a ni a, point hmu sang pahnih - West Bengal leh Mizoram team-te chuan final an khel a ni. 

Final Match-ah hian Mizoram team chuan West Bengal chu an captain Hat-trick siam hmanga hnehin 3-0-in an chak a, Mizoram team captain Shimon Chorei hi Man of the Tournament leh Top Scorer a thlah ni nghal bawkin he tournament chhung hian goal 6 lai a khung hman nghe nghe a ni.

Mizoram Football History a hriatreng tlak, kum 10 liam ta Santosh Trophy-a Mizoram Mipa team ten champion nomawi an chawina khawpui (Siliguri)- ah ngei Mizo mitdel tlangvalte hian nomawi an chawi ve a, final match-a an hnehna goal pawh Santosh Trophy-a Mizoram team chakna goal zat nen pawh a inang nghe nghe. 

November 11, 2025 khan Champion team-te hian Sairang rawn thlengin Mizoram Blind Sports Association(MBSA) hruaitu thenkhat leh mitdel football ngaihventu ten an lo hmuak a, MBSA Senior Vice President R Lalramthanga te chenna, Kanan ah hnehna an chan puala Pathian hnena lawmthu sawina neiin champion team-te hi Zanriah an buatsaihsak nghal a ni.

Champion Trophy lawmna inkhawm hi Senior Vice President R. Lalramthanga'n kaihruaiin Lalrampana, Mizoram Blind Sports Association President-in thusawi tawi a nei a. Mitdel infiamna ngaihlua ngaihventu kalkhawmte leh tlang hrang hranga mitdelte hmakhaw ngaitu Mizo mipui zawng zawng chungah lawmthu a sawi bawk. 

He hmuahna a tel ve MBSA Executive Member leh Information and Public Relation Officer ni bawk N. Vahneichhi, MIS chuan media lama min thehdarhsak dawn avangin lawmthu a sawi bawk a, theih tawp chhuaha Mizoram team tana tha thawhtu an players zawng zawng chungah lawmthu a sawi bawk a ni. 

Manager Jerry Lalramenga (General Secretary, MBSA) chuan technical report pein mitdel infiamna chanchin tlangpui a sawi a, Mizoram Blind Sports Association-in kum 2023 atanga mitdelte infiamna kawnga hma an lak dan leh Womens Blind Football team te kum zawna champion an nih thu leh Men's team an champion dan a sawi a, football mai bakah Para-Judo pawh an khelh thin thu a sawi bawk. Judo-ah phei chuan World Championship-a tel pha leh World Ranking-a No. 10 kawl mektu an nih thute a sawi a, Sawrkar leh Mizo mipui ten mitdel infiamna hi ngaih hlutsaka lo bengkhawn zual deuh deuh se a duh thu a sawi bawk a ni.